🌷 മൗനം വെടിയുക നമ്മൾ🌷

രചന : ബേബി മാത്യു അടിമാലി✍

അരുതായ്മകളെ ഇല്ലാതാക്കാൻ
മൗനം വെടിയുക സോദരരേ
ഒഴുക്കിനെതിരെ നീന്തുക നമ്മൾ
തൂലിക പടവാളാക്കിടുക
അക്ഷര വൈരികളരങ്ങുവാഴും
കാലംകെട്ടൊരു കാലമിത്
അശരണരാകും ജനതതിയിവിടെ
ഗതിയില്ലാതവരലയുമ്പോൾ
ഭയപ്പെടുത്താൻ തിട്ടൂരങ്ങൾ
അണിയറയിൽ നിന്നെത്തുന്നു
ശതകോടികളത് വാരിക്കൂട്ടാൻ
ഭീതി പടർത്തിടുമരചന്മാർ
പകുത്തു നൽകും നാടിൻ വിഭവം
മടിച്ചിടാതവർ വമ്പർക്കായ്
ചോദ്യം ചെയ്യും നാവുകളെല്ലാം
നിശബ്ദമാക്കാൻ തുനിയുമവർ
എടുത്തു ദുഷ്ടർ ഉപയോഗിക്കും
വിദ്വേഷത്തിൻ മന്ത്രങ്ങൾ
ഇനിയും നമ്മൾ മൗനികളായാൽ
നൽകേണ്ടിവരും വലിയ വില
നമ്മൾ സ്വപ്നം കണ്ടൊരു നാടിനെ
പടുത്തുയർത്താനൊന്നിക്കാം
ഒന്നിച്ചൊന്നായ്
മൗനം വെടിയുക
പുതിയ പ്രഭാതങ്ങൾക്കായ് നാം