🌂ശങ്കാജന്യമായ ചോദ്യങ്ങൾ, ശങ്കാരഹിതമായ ഉത്തരം🌂

രചന : കൃഷ്ണമോഹൻ കെ പി ✍️

ഉച്ചയ്ക്കു വന്നെൻ്റെ ഉച്ചി തലോടിയ
ഉത്തമനാകുന്ന പൂന്തെന്നലേ
ഉൽക്കർഷം നേടുവാനുത്സുകരായുള്ള
ഉല്പതിഷ്ണുക്കളെക്കണ്ടുവോ നീ?
ഉത്തരം കേൾക്കുവാൻ കാത്തിങ്ങിരിക്കുന്നു
ഉത്കണ്ഠയോടെയീ ഊഴിയിൽ ഞാൻ
ഉത്പലം തൻ്റെയിതൾ വിരിയും രാവിൻ
ഉന്മത്ത യാമങ്ങൾ മുന്നിലെത്തീ
ഉത്തരമേകുവാൻ വൈകുന്നതെന്തു നീ
ഊനം കൂടാതങ്ങു ചൊല്ലീടുക
ഊഷരതയ്ക്കൊരു ഉർവരതയുടെ
ഊർജ്ജം പകരുന്ന മാരുതൻ നീ
ഉൾക്കാഴ്ചയില്ലാത്ത ജീവ ജാലങ്ങളെ
ഊർദ്ധ്വൻവലിപ്പിക്കും വായുവും നീ
ഉത്കൃഷ്ടമാനസർക്കുല്ലാസമേകിടും
ഉത്തമപ്രാണനും, നീ താൻ സഖേ….
ഇല്ലില്ല വേണ്ടിനിയുത്തരമൊന്നുമേ
ഇണ്ടലില്ലാതെയങ്ങുള്ളിൽ നോക്കി
ഇക്കണ്ട ഭൂവിൻ ഭ്രമണത്തിൽക്കാണ്മൂ ഞാൻ
ഇജ്ജന്മമുക്തി തൻ മോക്ഷമാർഗം
ശീതക്കൊടുങ്കാറ്റിലാടിയുലയുന്ന
ശാശ്വതമാമീ പ്രപഞ്ചത്തിലെ
ശൈശവം മാറാത്ത മാനുഷ ജന്മങ്ങൾ
ശങ്കാഭരിതരായ് നോക്കി നില്പൂ🙏