രചന : മോഹനൻ താഴത്തേതിൽ അകത്തേത്തറ✍
കാണാൻ കൊതിക്കുമ്പോൾ കണ്ണിൽനിറയുന്ന
കണ്ണുനീർത്തുള്ളിയെൻ പ്രണയം
കേൾക്കാതിരിക്കുമ്പോൾ കേൾവിയിൽ തിരയുന്ന
മധുരമാംമൊഴിയെന്റെ പ്രണയം
പറയാൻകരുതിയ പദപ്രയോഗങ്ങളെ
പാത്തുവെയ്ക്കുന്നതെൻ പ്രണയം
ഒരുമാത്രയരികിലായ് ചേർത്തുപിടിക്കുവാൻ
ഉണരുന്നമോഹമെൻ പ്രണയം
താളംപിടിക്കുമെൻ ഹൃദയത്തിൻ സ്പന്ദനം
തിരയുന്നവരികളെൻ പ്രണയം
താഴെഞാൻ നിൽക്കുമ്പോളാകാശനീലിമ
വിതറുന്ന വർണ്ണമെൻ പ്രണയം
കാനനച്ചോലതൻ കാൽത്തളകിലുങ്ങുന്ന
കിലുക്കാംപെട്ടിയെൻ പ്രണയം
കാതരമിഴികളിൽ കൺമണിയാളവൾ
കാത്തുവെയ്ക്കുന്ന ലജ്ജയെൻ പ്രണയം
പറയാനറിയാത്ത കേൾക്കാൻ കൊതിക്കുന്ന
പരിഭവമൊഴിയെന്റെ പ്രണയം
പാതിവിരിഞ്ഞൊരു പനിനീർപൂവിന്റെ
മൃദുമന്ദഹാസമെൻ പ്രണയം
പ്രണയത്തോടൊപ്പമെൻ പ്രാണൻ വെടിയുവാൻ
പ്രാർത്ഥിക്കുന്നതാണെന്റെ പ്രണയം
കാണാൻ കൊതിക്കുമ്പോൾ കരളിൽ നിറയുന്ന
സ്വപ്ങ്ങളാണെന്റെ പ്രണയം
പ്രണയം……പ്രണയം….പ്രണയം.
