🐒മലയാളസൗന്ദര്യം🐰

രചന : കൃഷ്ണമോഹൻ കെ പി ✍

അചലവുമാഴിയുമതിരേകി നില്ക്കുന്ന
അനുപമസൗന്ദര്യകേതാരമേ,
അലകളാൽ ഞൊറി തീർത്ത് അലസം ഗമിക്കുന്നു
അരുവികൾ നിന്നുടെ ആത്മാവിലായ്
അടവിയും, വയലുമാ കളകൂജനങ്ങളും
അവിടുത്തെ ശോഭക്കു മാറ്റുകൂട്ടീ
അമരത്വമോലുന്ന കവികളോ നിന്നുടെ
അനവദ്യഭാവം കുറിച്ചു വയ്പൂ
അതിശോഭയാളുന്ന മലയാളമേ,നിൻ്റെ ,
അതിഥിയായ് ഞാനെന്നതെൻ്റെ പുണ്യം
അവിടുന്നു ചൊല്ലുന്ന മൃദുവാണി മലയാളം
അമൃതത്തിൻ മാത്രയായെന്നിലെത്തീ
അനിതരശോഭയോടൊളി ,മിന്നി നില്ക്കുന്ന
അളിവേണിയാകുമെൻ മലയാളമേ
അവിടുത്തെ മടിയിൽ ഞാൻ തല ചായ്ച്ചുറങ്ങുമ്പോൾ
അനഘമായ്ത്തീരുന്നെൻ ഭാവ ഗീതം🎻