🪴 മാനസ വൃന്ദാവനത്തിലൂടെ🪴

രചന: കൃഷ്ണമോഹൻ കെ പി ✍

മധുബിന്ദുവിറ്റുന്ന മലരിതൾ പോലൊരു
മഹിതപ്രഭാതത്തിൻ ചെന്നിറത്തിൽ
മതിമറന്നോതുന്നു വാക്കുകൾ മത്സഖേ
മനമോടെ നേരുന്നു, സുപ്രഭാതം
നീളെപ്പരക്കുന്ന നവ്യസുഗന്ധത്താൽ
പൂരിതമാകുന്ന യാമമൊന്നിൽ
നീരജം പുഷ്പദലങ്ങൾ വിടർത്തിയോ
പൂവണിഞ്ഞോ,രാഗ വിസ്മയങ്ങൾ
മാനസമെന്നൊരു നാദവിപഞ്ചിക
മാധുര്യമുള്ളൊരു ഗാനവുമായ്
മായാത്ത രോമാഞ്ചകഞ്ചുകം ചാർത്തിയ
മാമകപ്പുൽക്കുടിൽ സാനുവിങ്കൽ
മാനത്തു നിന്നൊരു മഞ്ജുള ഗാത്രി പോൽ
മാദക സ്വപ്നം പറന്നിറങ്ങീ
പാത തന്നോരത്തു നിന്നിടുമെന്നുടെ
പാതി മനസ്സു പകുത്തെടുത്തൂ
ഇന്ദ്രിയം പൂത്തിടുമിന്ദ്ര ധനുസ്സിൻ്റെ
മന്ദഹാസത്തിൻ കുളിരണിഞ്ഞ്
ചന്ദനലേപിതനായിച്ചമഞ്ഞൊരെൻ
വൃന്ദാവനത്തിലായ് ഞാനലഞ്ഞൂ.