കുളം

രചന : അൻസാരി ബഷീർ ✍

പടവടർന്നു, കൈപ്പിടിയിളകിയ
പഴയ ചരുവമായ് കുളമിരിക്കുന്നു
പകലടുപ്പിൽ അരക്കുളംവെള്ളത്തിൽ
പായലെന്ന ഗ്രീൻടീ തിളയ്ക്കുന്നു.
രണ്ടിതൾ കരയാമ്പുവിട്ട പോൽ
നീർപ്പറവകൾ മുങ്ങി നിവരുന്നു
പാട നീക്കിയ പാലൊഴിക്കുവാൻ
മേഘമകലെനിന്നെത്തി നോക്കുന്നു.
കരയിൽനിന്നു പൂങ്കാെമ്പ് ചാഞ്ഞുവ –
ന്നതിലിളക്കി മധുരം കലർത്തുന്നു.
ആവി പൊങ്ങുമ്പോളൂതിയാറ്റുവാൻ
അകലെനിന്ന് കാറ്റോടിയെത്തുന്നു.
ടീ തിളച്ചു തൂവുന്നതിൻമുമ്പ്
തീകെടുത്തിയാ സൂര്യൻ മറയുന്നു
ആരുമെത്തി മോന്തുവാനില്ലാതെ
ചായയാറിത്തണുത്തു കേടാകുന്നു!
ആരുമെത്തുകില്ലെന്നറിഞ്ഞിട്ടുമാ
സൂര്യനെന്നും ചായ കാച്ചുന്നതും
നോക്കിയിന്നെന്റെ ജീവിതച്ചായയിൽ
ഈച്ച വീണത് കോരിമാറ്റുന്നു ഞാൻ!