👑 സമസ്യാ നിവാരിണീ👑

രചന : കൃഷ്‌ണ മോഹൻ കെ പി ✍️

സന്ധ്യാംബരത്തിൻ്റെ സിന്ദൂരഛവി
നിൻ്റെ സുന്ദര ഫാലത്തിലെ,
തിലകക്കുറിയാക്കി
സൗമ്യയായ് പുഞ്ചിരി തൂകി വന്നെത്തീടുന്ന,
സുന്ദരീ, സരസ്വതീ,താവക ദർശനത്താൽ
സ്വർഗ്ഗീയ സുഖമെന്ന സ്വപ്നത്തിലലിഞ്ഞു ഞാൻ
സ്വത്വത്തെയുണർത്തുവാൻ സാധകം ചെയ്തീടുന്നൂ…..
സാമഗാനത്തിൻ്റെയാ സ്വര നിർഝരികളിൽ…..
സാദരം നിമഗ്നനായ്, സഞ്ചരിക്കട്ടേ മെല്ലെ ……..
സൂര്യനും, ചന്ദ്രനുമീ ഭൂമിയും വിദ്യാ ദേവീ …..
സാന്ദ്രമായ് മരുവുന്നു ത്വൽകൃപാ കടാക്ഷത്താൽ …
സംഗീതമുണരുന്നു, താവക ചലനത്താൽ,
സർവകലകൾക്കും നിൻ സാമീപ്യം ശുഭമായി…..
സോദര സ്നേഹത്തിൻ്റെ അലകളെയുണർത്തുവാൻ,.
സ്വാമിനിയെത്തുന്നേരം,മണ്ണിതു വിണ്ണാകുന്നു…..
സാരസോത്ഭവൻ തൻ്റെ സീമ്നി, നീയിരുന്നിതാ ……
സാഗര ശയനൻ്റെ മിഴികൾ തുറപ്പിപ്പൂ ….
സാമ്യമില്ലാത്ത നിൻ്റെ സാരസ നടനത്തെ,
സാകൂതം നോക്കീടുന്നൂ സർവരും പ്രഭാമയീ…..
സകല കലകൾക്കുമേ അഴകുകൾ സമ്മാനിയ്ക്കും,….
സരസ്വതീ, തവ പാദം നമിപ്പൂ, നമിപ്പൂ,മാം 🙏