രചന : അഹ്‌മദ് മുഈനുദ്ദീൻ.✍
പച്ചക്കറിവണ്ടി ഓടിക്കുന്നത്
റൊണാൾഡോ.
വിളിച്ച് പറയുന്നതും
തൂക്കിക്കൊടുക്കുന്നതും
മെസ്സി.
വീട്ടിൽ
പെയിൻ്റ് പണിക്ക് വന്നിരുന്നു
തടിച്ചൊരു റൊണാൾഡോ.
ഇന്നലെ
പൈപ്പ് നന്നാക്കിയത്
ഹിന്ദി പറയുന്ന മെസ്സി.
ബാർബർ ഷോപ്പിൽ
പുതിയൊരു റൊണാൾഡോ വന്നിട്ടുണ്ട്.
പരിചയപ്പെട്ടു
പേര് ചോദിച്ചു
സദഖത്തുള്ള ആലം.
ഫരീദ ഹോട്ടലിലെ
പൊറോട്ടക്കാരൻമെസ്സിയുടെ
പേര് എനിക്കറിയാം.
പ്രഫുൽ കുമാർ ബിശ്വാസ് .
റോഡ് പണിക്കുള്ള
ലോറി വന്നു നിന്നു
ഒരു ലോഡ് മെസ്സിയെ /
റൊണാൾഡോയെ
റോഡരുകിൽ
തട്ടി,
കടന്നുപോയി.
