🍃 മലരേ നീ വീണ്ടും പറന്നിറങ്ങീ🍂

രചന : കൃഷ്ണമോഹൻ കെ പി ✍

അനുപമ സൗന്ദര്യലഹരിയായെന്നുടെ
അരികിൽ നീ മലരായ് വിരിഞ്ഞു നില്ക്കേ
അവിരാമമൊഴുകുന്ന നദിപോലെ മാനസം
അതിലോല കവിതതൻ ശീലു കേൾപ്പൂ

അനുരാഗമാലിനിപ്പുഴയുടെയോരത്തെ
മനുജാഭിലാഷമാം പൂമരത്തിൽ
അളവറ്റ പ്രേമത്തിൻ ഗീതങ്ങളങ്ങനെ
മുരളിയിൽ കാർവർണ്ണനൂതിടുന്നൂ

പ്രണയാർദ്രയാകിയ പുളിനത്തിൽ മെല്ലെയാ
തണുവാർന്ന പാർവണം പായ് വിരിച്ചൂ
മണമുള്ള പവനൻ്റെ താരാട്ടുപാട്ടിനായ്
മണവാട്ടിയായി നീ,കാത്തു നില്പൂ

ഇണചേരും പറവകൾ തന്നുടെ പാട്ടിനായ്
അണയാത്ത മോഹമാം മൺ തുരുത്തിൽ
ഒരു പുതു സ്വപ്നത്തിൻ ചിറകേന്തിയിന്നിതാ
മലരേ നീ വീണ്ടും പറന്നിറങ്ങീ….🧚🏽‍♂️