🌓കല്പനകളുടെ കണിവിളക്കുമേന്തി🌓

രചന : കൃഷ്ണമോഹൻ കെ പി ✍

മയിലിൻ്റെ പീലിയെ, തൂലികയാക്കിയെൻ,
മനമൊരുകവിത, കുറിച്ചു വച്ചൂ
കുയിലിൻ്റെ നാദത്തെ സ്വരമാ.. ധുരിയാക്കി
ഒരു ഗാനം മെല്ലെ ഞാൻ പാടീ
പ്രകൃതി തൻ ഭംഗി കണ്ടാനന്ദമോടൊരു
നിറമാർന്ന ചിത്രം വരച്ചൂ
കടലിൻ്റെ നീലിമയാവാഹിച്ചിന്നു ഞാൻ
കനവുകൾ കണ്ടു മയങ്ങീ
ഗഗനത്തിൻ നീലിമ മുകിലായി വന്നൊരു
തിരശീല മെല്ലേയുയർത്തീ
നടനത്തിൻ ശാസ്ത്രമൊട്ടറിയില്ലയെങ്കിലും,
ചുവടുകൾ മെല്ലേ ഞാൻ വയ്ച്ചൂ
ഒരു രാഗ വൃന്ദാവനത്തിൽ ഞാൻ കണ്ണൻ്റെ
മുരളികയായിട്ടു മാറീ..
അവനിയിലതിരുകളില്ലാത്ത ഭാവന
അലസമായ്, ചുറ്റിപ്പറന്നൂ..
ഒരു മൃദു മന്ത്രണം മനസ്സിലെ വീണയിൽ
ഒലിയായി വന്നെത്തിയപ്പോൾ
അഖിലർക്കുമുന്മേഷമേകുവാനായിട്ട്
അഖിലേശ്വരി തൻ്റെ ശബ്ദം
അതു കേട്ടിട്ടാനന്ദതുന്ദിലനായി ഞാൻ
അജ്ഞതയെങ്ങോ മറഞ്ഞൂ🎻