🌾 വയൽ വരമ്പത്തു നിന്ന്🌾

രചന : കൃഷ്ണമോഹൻ കെ പി ✍

വിതുരനായൊരു വയലിനരികിലെ
വരമ്പത്തങ്ങനെ നില്ക്കവേ..
വ്രണിത ചിത്തത്തിൽ വരണ്ട ചിന്തയിൽ
വിരഹഗീതത്തെക്കേൾപ്പു ഞാൻ
വികല സങ്കല്പമൊരുക്കി വച്ചൊരു
വലയിൽപ്പെട്ടുള്ള മീനു പോൽ
വിളറുമോർമ്മകൾ വിനയായ്ത്തീർന്നെൻ്റെ
വലിയ ജീവിതപ്പാതയിൽ
വ്യഥയുയർത്തിയ വേണു നാദത്തിൽ
വരമൊഴികൾ ഞാൻതേടവേ
വനസംഗീതത്തിൻ മധുരനാദങ്ങൾ
വസന്തരാഗമായ് മാറിയോ
വാനവിസ്തൃതി തന്നിലങ്ങനെ
വായനയാൽ പറക്കവേ
വാരിളം പൂക്കൾ കൺ തുറക്കുന്നു
വാസരം ദീപ്തമാകുന്നൂ
വരകൾ ചേർന്നൊരു ചിത്രമാകുന്നു
വരികൾ ഗീതകമാകുന്നൂ
വില കുറഞ്ഞൊരെൻ ജീവബിന്ദുക്കൾ
വാരിധിയെപ്പുണരുന്നൂ🪷