🛕തർപ്പണ മനസ്സോടെ🛕

രചന : കൃഷ്ണമോഹൻ കെ പി ✍

ശൈശവം, ബാല്യവും, കൗമാരവും തന്നിൽ
ശക്തി പകർന്നവർ നിങ്ങളല്ലോ
ശക്തി സ്വരൂപിണിയാകിയ മാതാവും,
ശക്തനായുള്ള പിതാവുമത്രേ
യൗവനത്തിൻ്റെ മദത്തിൽ തിളച്ചപ്പോൾ
യമനിയമാദികൾ ചൊല്ലിയോർകൾ
മധ്യവയസ്സിൽ ഞാനെത്തിയപ്പോഴങ്ങ്
മധ്യേയങ്ങിട്ടിട്ടു വേർപിരിഞ്ഞൂ
ആതുരനായി നടക്കുന്നിക്കാലം ഞാൻ
ആ നാളുകളെല്ലാമോർത്തിടുമ്പോൾ
ആത്മാക്കളായെത്തി എൻ മനോ മുറ്റത്ത്
ആയിരമോർമ്മത്തിരി കൊളുത്തീ
കർക്കടകത്തിലമാവാസിനാൾ വന്ന്
കല്മഷം നീക്കും പിതൃജനങ്ങൾ
പൂജിതരേ, നിങ്ങൾക്കേകുവാനെൻ്റെയീ
പൂരിതമല്ലാത്ത ദാഹങ്ങളെ
പൂർണ്ണ മനസ്സോടെ, ദാഹമായ് വയ്പു ഞാൻ
പൂർണ്ണമോദത്തോടെ തർപ്പണവും