🙏 ഭാരതാംബേ, ഭവതിക്ക് ജന്മദിനാശംസകൾ🙏

രചന : കൃഷ്ണമോഹൻ കെ പി ✍

ഉത്തുംഗ ഹിമാലയം ഉത്തരദേശത്തിലായ്
ഉത്തരം കിട്ടാത്തൊരു വന്മതിലായിക്കൊണ്ടും,
ഉത്തമ വാരാന്നിധി ദക്ഷിണ ഭാഗത്തിൻ്റെ
ഉത്തരവാദിത്വത്തെപ്പേറിയും നിന്നീടുമ്പോൾ
ഉല്പലാക്ഷിയാം ദേവി, കന്യാകുമാരിയും, ഹാ
ഉത്തരേശ്വരനായ അമർനാഥനുമങ്ങ്
ഉത്തമഹൃത്തങ്ങളെയുണർത്താനനുവേലം
ഉദ്യുക്തരായ് നില്ക്കുമീ ഭാരത ദേശത്തിൻ്റെ
പശ്ചിമപാരാവാരം തിരകളായരങ്ങിലും
പൂർവദേശത്തിൽ വാഴും ബംഗളാസമുദ്രവും
പദ്ധതി മധ്യേ ആഹാ, വിന്ധ്യനും സഹ്യാദ്രിയും
പൂർണ്ണമാം മനസ്സോടെ വന്ദിയ്ക്കും മഹാഭാഗേ
പൂർവജന്മത്തിൽച്ചെയ്ത പുണ്യങ്ങളാണോ മാതേ,
പൂരിത ഭാവോജ്ജ്വല ഭൂമിയിൽ പിറന്നൂ ഞാൻ
പഞ്ചമിത്തിങ്കളും, നിൻ, മൃദുനിസ്വനങ്ങളെ
പല്ലവിയായിട്ടെൻ്റെ കാതിലായ് പകരുന്ന
പഞ്ചമരാഗം മൂളും പവനനോ ഹൃത്തട്ടിലെ
പുന്നാഗശാഖ തന്മേൽ മരന്ദം പുരട്ടുന്നൂ
പാരിൽ, ഒന്നറിയാതെ ഭാസുരേ ഭരതാംബേ
പാഴ് വാക്കുകളാലേ സ്തുതിക്കാൻ തുടങ്ങില്ലാ
ഏകത നാനാത്വത്തിൽ എന്നും സമന്വയിപ്പിക്കും
ഏണാങ്കമുഖിയാകും ഭരതേ
” നമോവാകം”🙏