🟥 മൂല്യത്തെയളക്കുന്നൂ മൂലം✍️

രചന : കൃഷ്ണമോഹൻ കെ പി ✍

മൂലമെന്നതു കേൾക്കിലേതൊരു മനുഷ്യർക്കും
മൂകദു:ഖമായി, മാറുമെന്നിരിക്കിലും
മൂലകൾ തിരിക്കുവാൻ മൂലത്തെക്കണ്ടെത്തേണം
മൂല്യവാനറിയുന്നു, മൂലത്തിൻ മാഹാത്മ്യത്തെ
മൂവുരു ചൊല്ലൂ നിങ്ങൾ, മൂലമെന്നൊരു വാക്ക്
മൂന്നിനും മൂന്നർത്ഥമായ് ഭവിക്കുമറിയേണം
മൂലമെന്നതു സാക്ഷാൽ പ്രപഞ്ചേശ്വരൻ, വിഷ്ണു
മൂലത്തെച്ചിലർ വെറും പൃഷ്ഠമായ് കണ്ടീടുന്നൂ
മൂലമെന്നതു പക്ഷേ, കാരണമായിക്കാണാം
മൂല്യത്തെയളക്കുവാനായിട്ടുള്ള, അളവായതും കാണാം…
മൂലത്തിൽ കിളിർക്കുന്ന ആലിൻ്റെ തണലിലെ
മൂഢമാം തല്പം തന്നിൽ വിശ്രമിച്ചിരുന്നിട്ട്
മൂലത്തെക്കാണതെയും, കണ്ടെങ്കിൽ മറന്നുമീ
മൂലാധാരമെന്ന വിസ്മയ പ്രാകാരത്തിൽ
മൂലമീ ഓണത്തിൻ്റെ മൂല്യമായ് കാണാതെന്തേ
മൂകമായിരിക്കുന്നൂ,, മാനവമനസ്സാക്ഷി?!
മൂലംനാൾ പിറന്നവർ, മൂല്യമുൾക്കൊള്ളുന്നൂവെന്ന്
മൂത്തവർ ചൊന്നൂ, അതു വാസ്തവമാണോ, ആവോ?!!
മൂർത്തമാം ഭാവങ്ങളെയുൾക്കൊണ്ടു നില കൊള്ളും
മൂലത്തെ മറന്നൊന്നും ചെയ്യായ്കിൽ വിജയിക്കാം🟩