🪶 സാഗരത്തിരകൾപോൽ ഗാന്ധി സൂക്തങ്ങളോർക്കേ🪶

രചന : കൃഷ്ണമോഹൻ കെ പി ✍

സിന്ധു പുഞ്ചിരിക്കുന്നു ഗംഗയും ചിരിക്കുന്നു
നർമ്മദ, കാവേരികൾ, ആഹ്ലാദത്തിമർപ്പാർന്നൂ
ഗീതയും കൈയിലേന്തി,ജാഥകൾ നയിക്കാനായ്.
വീഥികൾ തുറക്കാനായ് നീ വന്നു പിറന്നപ്പോൾ
ഹിന്ദുവും മുസൽമാനും ജൈനനും പിന്നെയിങ്ങീ
കൃസ്ത്യാനിസമൂഹവും ബുദ്ധമതക്കാരുമേ
മണിമുത്തുകൾ തന്നെ ഭാരതസംസ്ക്കാരത്തിൻ
മണിമാലയിൽ കോർത്ത രത്നമെന്നുരച്ചു നീ
ഭാരതാംബയുടെ ഭാഗ്യ ദീപവുമേന്തി
ഭാസുരാംഗനായിട്ടു നീ വന്നു പിറന്നപ്പോൾ
ഭാരതാംബയുടെ അടിമത്വത്തെ വെല്ലാൻ…..
ഭാവോജ്ജ്വലമായ നിരാഹാരത്തെ പുൽകീ
ബാപ്പുജി , മഹാത്മജി, മാനവോത്തമൻ പിന്നെ
ബാക്കിവച്ചുള്ളോരാ…… സ്വാതന്ത്ര്യം പുനരേകീ
ബാലാരിഷ്ടത തീരാതങ്ങനെയുഴറിയ
ബാലയാം ഭൂമിയിൽ നിന്നങ്ങനെ മറഞ്ഞപ്പോൾ …….
ലോലചിത്തയായ ഭാരതം വിലപിച്ചൂ
ലോകവും വിലപിച്ചു ഓർക്കാതിരിക്കാൻ വയ്യ
ലൗകികലോകം വിട്ടു വിഷ്ണു തല്പത്തിൽ ചേർന്നു
ലോകത്തിൽ ഭവാനെന്നും അമരനായ് വിളങ്ങുന്നൂ.