🍁റ്റെഡിബെയർ 💞

രചന : സിജി സജീവ് ✍

🍁
നീയെനിക്കാദ്യമായി
കൈക്കുമ്പിളിൽ തടഞ്ഞ
റ്റെടിബെയർ
പോലെയാകുമ്പോൾ.
അത്രമേൽ ആഴവും ഹൃദ്യവുമായൊരു
ഇഴയടുപ്പം നമുക്കിടയിൽ
കണ്ണുപൊത്തിക്കളിക്കുന്നുണ്ടായിരുന്നു
അതുകൊണ്ടാണല്ലോ
അവസാനനാളിലെ
പാതിബോധത്തിലും
കണ്ണുകളടയും മുൻപ്
നിന്നേ തിരഞ്ഞത്..
ആരൊക്കെയോ പറയുന്നു
ഓർമ്മകൾ പോയെന്നും,
ചെറുതിലെ കഥകളാണ്
ചുണ്ടുകൾ ചിലമ്പുന്നതെന്നും,,
ഇന്നിന്റെ കഥയാണെന്നു
ആരു പറയാൻ ആരോട് പറയാൻ,,!
അടഞ്ഞുപോകുന്ന
കണ്ണുകൾ, തളർന്നു പോയ നാവ്,
ജോലി ഉപേക്ഷിക്കാൻ ഊർദ്ദം വലിക്കുന്ന നാസിക..
തിരിഞ്ഞു നടക്കുന്ന
റ്റെഡിബെയറിന്റെ കൈകളിൽ കൈകോർക്കുമ്പോൾ
ഞാനും ഒരു റ്റെഡിബെയറായി
പരിണമിച്ചിരുന്നു…
ഞങ്ങൾ തിരിഞ്ഞു
നോക്കാത്തൊരു
യാത്രയാരംഭിച്ചിരുന്നു…
🍁