👽 മുത്തശ്ശിയോട്👽

രചന : കൃഷ്ണമോഹൻ കെ പി ✍️

വിരിയുന്ന മൊട്ടു പോൽ വിലസിതമാകുന്ന
വിമലമാം ശിശുവിൻ്റെ മേനിയിന്മേൽ
വിരലുകളോട്ടിയിരിക്കുന്ന മാനിനീ
വിപുലമായ്ത്തീരട്ടെ ജീവസ്വപ്നം
വിഫലമാവില്ല നിൻ ജീവിത സായാഹ്നം
വിരസതയെല്ലാമകന്നു പോകും
വരമാണു നിന്നുടെ കൈയിലെപ്പൂവിതൾ
വരവർണ്ണിനിയുടെ, വരദാനമാം..
വിഷമിച്ചു നീങ്ങിയ നാളുകൾ മാഞ്ഞു പോയ്
വിരഹത്തിൻ ചൂടും കുറഞ്ഞിടുന്നൂ
വിദുഷി നീ ചൊല്ലുന്ന കഥയൊന്നു കേൾക്കുവാൻ
വിമലേയീക്കുഞ്ഞിനും മോഹമുണ്ട്
വൻ സ്വപ്നജാലങ്ങളാറ്റിക്കുറുക്കി നീ
വർണ്ണാഭയോലും കഥ മെനഞ്ഞീ
വായ്പോടെ കുഞ്ഞിൻ്റെ കാതിൽ പകരുക
വാരിപ്പുണരുകാ സൗഭഗത്തെ .. 🙏🌹