രചന : ബിനു മോനിപ്പള്ളി✍
അമ്മിഞ്ഞപ്പാലിന്റെ നറുമണമോലുന്ന
അതിരറ്റ സ്നേഹമാണമ്മ
ആദ്യമായ് നാവിൽ ഞാൻ കൊഞ്ചിപ്പറഞ്ഞൊരാ
കൽക്കണ്ട മധുരമാണമ്മ
എന്നും, കൺകണ്ട ദൈവമെൻ അമ്മ
പേറ്റിപ്പെറുക്കുന്ന* നേരത്ത് കേൾക്കാത്തൊരി-
‘ശ് ശ് ..” പാട്ട് പാടുമെന്നമ്മ
പുന്നെല്ലിൻ പൊടിയരി പേറ്റിയെടുത്തതിൽ
ചക്കര ചേർക്കുമെന്നമ്മ
നല്ല, പായസമൂട്ടുമെൻ അമ്മ
ചാണകത്തറയിലായ് പാ വിരിച്ചന്നെന്നെ
താരാട്ടു പാടിയെന്നമ്മ
വിരലും കുടിച്ചു ഞാൻ ഒട്ടു മയങ്ങുമ്പോൾ
പാപ്പം കുറുക്കുമെന്നമ്മ
ഇന്നും, കനിവിന്റെ ഖനിയാണെൻ അമ്മ