തമിഴ് ഹാസ്യ നടന്‍ വടിവേല്‍ ബാലാജി അന്തരിച്ചു. 45 വയസായിരുന്നു. ഹൃദയാഘാതത്തെ തുടര്‍ന്ന് ദിവസങ്ങളായി ആശുപത്രിയില്‍ കഴിയുകയായിരുന്നു. ഇന്ന് രാവിലെ മരിച്ചു. ഒട്ടേറെ സിനിമകളില്‍ വേഷമിട്ട വടിവേല്‍ ബാലാജിയുടെ ടെലിവിഷന്‍ ഷോകളും ജനശ്രദ്ധയാകര്‍ഷിച്ചിരുന്നു. നടന്‍ വടിവേലുവിനെ ഏറ്റവും നന്നായി അനുകരിക്കുന്നതാണ് വടിവേല്‍ ബാലാജി എന്ന വിളിപ്പേര് വരാന്‍ കാരണം.
അത് ഇത് ഏത്, കലകപോവത് യാര് തുടങ്ങിയ ജനകീയമായ ടെലിവിഷന്‍ ഷോ അവതിപ്പിച്ചിരുന്നു വടിവേല്‍ ബാലാജി. ഇദ്ദേഹത്തിന്റെ അകാല ചരമത്തില്‍ തമിഴ് സിനിമാ ലോകം ഞെട്ടലിലാണ്. ദിവസങ്ങള്‍ക്ക് മുമ്പാണ് ഹൃദയാഘാതത്തെ തുടര്‍ന്ന് ചെന്നൈയിലെ ആശുപത്രിയില്‍ പ്രവേശിപ്പിച്ചത്. ആരോഗ്യനില വഷളായതിനെ തുടര്‍ന്ന് വെന്റിലേറ്ററിന്റെ സഹായത്തിലായിരുന്നു.ഭാര്യയും രണ്ടു മക്കളുമുണ്ട്.മധുരയില്‍ ജനിച്ച വടിവേല്‍ ബാലാജി 1991ലാണ് ആദ്യമായി സിനിമയില്‍ എത്തിയത്. എന്‍ രാസാവിന്‍ മനസിലെ ആയിരുന്നു ആദ്യ ചിത്രം.