പി എസ് സി കാലങ്ങളായി തുടരുന്ന മാതൃഭാഷാവഗണന അവസാനിപ്പിക്കുന്നതിന് ബഹുമാനപ്പെട്ട കേരളാ മുഖ്യമന്ത്രി ഇടപെടുക !!
കേരളാ പി എസ് സി പ്രൈമറി അധ്യാപക പരീക്ഷയില്‍ നിന്ന് മാതൃഭാഷയെ മാത്രം ഒഴിവാക്കിക്കൊണ്ട് വര്‍ഷങ്ങളായി തുടരുന്ന വിവേചനം അവസാനിപ്പിക്കുക. കേരളത്തിലെ പൊതുവിദ്യാഭ്യാസത്തെയും മാതൃഭാഷാപഠനത്തെയും ദുര്‍ബലപ്പെടുത്തുന്ന ഈ നിലപാട് അടിയന്തിരമായും പുനപരിശോധിക്കുകയും പരീക്ഷാ സിലബസ്സില്‍ മാതൃഭാഷയെ ഉള്‍പ്പെടുത്തുകയും ചെയ്യുക. ഭാഷയെയും സംസ്കാരത്തെയും വരുംതലമുറയ്ക്ക് അന്യമാക്കുന്ന ഈ നയം നമ്മുടെ നാടിന്റെ ഭാവിയെതന്നെ ഇല്ലായ്മചെയ്യും.
പ്രൈമറി അധ്യാപകപരീക്ഷയിൽ മാതൃഭാഷയ്ക്ക് സംഭവിച്ചത്.
കേരളത്തിലെ പൊതുവിദ്യാലയങ്ങളില്‍ എല്‍.പി / യു.പി ക്ലാസുകളില്‍ പഠിപ്പിക്കാനുള്ള അധ്യാപകരെ തെരഞ്ഞെടുക്കാന്‍ കേരള പബ്ലിക് സര്‍വീസ് കമ്മീഷന്‍ നടത്തുന്ന എഴുത്തുപരീക്ഷയുടെ സിലബസില്‍ നിന്ന് മാതൃഭാഷ ഒരു വിഷയമെന്ന നിലയില്‍ വര്‍ഷങ്ങളായി ഒഴിവാക്കപ്പെട്ടിരിക്കയാണ്. മാതൃഭാഷയുടെ ഔദ്യോഗികവും അക്കാദമികവുമായ നിലനില്‍പ്പിനുതന്നെ ദൂരവ്യാപക പ്രത്യാഘാതം ഉണ്ടാക്കുന്ന ഈ നിലപാട് അക്കാദമിക ഔദ്യോഗിക മേഖലകളില്‍നിന്ന് മാതൃഭാഷയെ പടിയടച്ച് പിണ്ഡം വെക്കാനുള്ള കാലങ്ങളായി തുടരുന്ന ശ്രമങ്ങളുടെ ഭാഗമായേ മനസ്സിലാക്കാന്‍ കഴിയൂ.
നമ്മുടെ പ്രൈമറി ക്ലാസുകളിലെ പഠനം, കരിക്കുലം എന്നത് സംബന്ധിച്ച പ്രാഥമിക ധാരണയെങ്കിലും ഉള്ളവരാണോ ഈ സിലബസ് തയ്യാറാക്കുന്നത് എന്നതാണ് അത്ഭുതകരം. ഇത്ര ഉദാസീനവും അലംഭാവപൂര്‍ണവും ആയാണോ കുഞ്ഞുങ്ങളുടെ വിദ്യാഭ്യാസം കരുപ്പിടിപ്പിക്കാനുള്ള പ്രക്രിയയില്‍ പി.എസ്.സി പോലുള്ള ഒരു സ്ഥാപനം ഇടപെടുന്നത് എന്നത് സത്യത്തില്‍ പേടിപ്പിക്കുന്നതാണ്. ലോവര്‍ പ്രൈമറി ക്ലാസ്സുകളില്‍ പൊതുവില്‍ ഉദ്ഗ്രഥിത (integrated) വിഷയസമീപനം ആണ് കൈക്കൊണ്ടിട്ടുള്ളത്. ഒന്ന്, രണ്ട് ക്ലാസുകളില്‍ ഓരോ വിഷയത്തിനും പ്രത്യേകം പുസ്തകം പോലുമില്ല. മാതൃഭാഷയിലൂന്നിയാണ് പരിസരപഠനവും ഗണിതപഠനവും പോലും. മൂന്ന്, നാല് ക്ലാസുകളില്‍ വ്യത്യസ്ത പുസ്തകങ്ങള്‍ ഉണ്ടെങ്കിലും അവിടെയും പ്രാധാന്യം മാതൃഭാഷാ പഠനത്തിനുതന്നെയാണ്. അഞ്ചാം തരാം മുതല്‍ അടിസ്ഥാന പാഠാവലി, കേരള പാഠാവലി എന്നിങ്ങനെ ഭാഷയുടെയും സാഹിത്യത്തിന്റെയും വിശാലമായ ലോകമാണ് കുഞ്ഞുങ്ങളെ പരിചയപ്പെടുത്താനുള്ളത്. മാത്രമല്ല, മാതൃഭാഷയില്‍ അനുഭവങ്ങള്‍ പ്രദാനം ചെയ്തുവേണം മറ്റെല്ലാ വിഷയത്തിന്റെയും പ്രാഥമിക ധാരണയിലേക്ക് പ്രൈമറി ഘട്ടത്തില്‍ കടക്കാന്‍. അതിലേക്ക് കുട്ടികളെ ശ്രദ്ധാപൂര്‍വ്വം കൈപിടിച്ച് നടത്താന്‍ മാതൃഭാഷയിലെ ശേഷി ഒരു പരീക്ഷയില്‍ കൂടി അളക്കാതെ എങ്ങനെയാണ് കഴിയുക? ഇത്തരത്തില്‍ ഭാഷയെയും സാഹിത്യത്തെയും മാറ്റിനിര്‍ത്തി തെരഞ്ഞെടുക്കപ്പെടുന്ന ആളുകള്‍ക്ക് കുഞ്ഞുങ്ങളുടെ ഭാഷാശേഷിയെ എങ്ങനെ വളര്‍ത്തിയെടുക്കാനാകും?
ഒരു പരീക്ഷയിലോ സിലബസിലോ മാതൃഭാഷയെ ഉള്‍പ്പെടുത്തുന്ന, കേവലം പത്തോ ഇരുപതോ മാര്‍ക്കിന്റെ കാര്യം മാത്രമല്ല ഇതിലുള്ളത്. കുട്ടികളില്‍ ശരിയായ ഭാഷാവബോധം ഉറയ്ക്കുന്ന നിര്‍ണായക പടവ് പ്രൈമറി ക്ലാസുകളാണ്.
ഈ പരീക്ഷയെഴുതി പ്രൈമറി അധ്യാപകരാകാന്‍ വേണ്ടി മാത്രം നടത്തപ്പെടുന്ന അധ്യാപകപരിശീലന കേന്ദ്രങ്ങളില്‍ പിന്നെന്തിന് മാതൃഭാഷ പഠിപ്പിക്കണം? അതിന്റെ സിലബസില്‍ എന്തിന് മാതൃഭാഷ നിലനിര്‍ത്തണം? നാലു സെമസ്റ്ററുകളില്‍ വലിയ പ്രാധാന്യത്തോടെ അവിടങ്ങളില്‍ പഠിപ്പിച്ചുവരുന്ന മാതൃഭാഷ കൂടി ഇതുപ്രകാരം നാളെ ഒഴിവാക്കപ്പെടില്ലേ? സിലബസില്‍ നിന്ന് പുറത്താക്കപ്പെടുക എന്നാല്‍ അതിന്റെ പഠനമേഖലയില്‍ നിന്ന് പുറത്താക്കുക എന്നതുതന്നെയാണ്.
മാതൃഭാഷ എഴുതാനും വായിക്കാനും മാത്രം അറിഞ്ഞാല്‍ മതി എന്നും അതുവെച്ച് കുഞ്ഞുങ്ങളുടെ ഭാഷാശേഷീവികസനത്തിന് ആവശ്യമായ കാര്യങ്ങളെല്ലാം ചെയ്യാന്‍ ഒരാള്‍ക്ക് കഴിയും എന്നും പി എസ് സി തീരുമാനിക്കുന്നത് ഏതു ശാസ്ത്രീയബോധ്യത്തിന്റെ അടിസ്ഥാനത്തിലാണ്? അടിസ്ഥാന വ്യാകരണപാഠങ്ങള്‍, ഭാഷയുടെയും സാഹിത്യത്തിന്റെയും ചരിത്രപരമായ പഠനം, സാഹിത്യ പ്രസ്ഥാനങ്ങളെ കുറിച്ചുള്ള അടിസ്ഥാന ധാരണ ഇവയെല്ലാം ഇത്രയും കാലം ഡി.എല്‍.എഡ്ഡിന്റെ ഭാഗമായി പഠിച്ചത് അധ്യാപക പരീക്ഷാ സന്ദര്‍ഭത്തില്‍ ഓര്‍ക്കുക കൂടി വേണ്ട എന്നാണു ഇതിനര്‍ത്ഥം. കെ.ടെറ്റില്‍ അടക്കം മാതൃഭാഷ പ്രാധാന്യത്തോടെ ഉള്‍പ്പെടുത്തിയിട്ടുള്ളപ്പോഴാണ് പി എസ് സി യുടെ ഈ നടപടി. പ്രധാന വ്യാകരണ നിയമങ്ങള്‍, ഭാഷയുടെ തനിമയുടെ ഭാഗമായ പഴഞ്ചൊല്ലുകളും ശൈലികളും, തെറ്റും ശരിയുമായ ഭാഷാപ്രയോഗങ്ങള്‍ മുതലായവയെല്ലാം ഇനി മുതല്‍ പഠനത്തിന്റെയും പരീക്ഷയുടെയും ഭാഗമാല്ലാതാവുമ്പോള്‍ എന്തായിരിക്കും നാളെ മാതൃഭാഷയുടെ അവസ്ഥ എന്ന് വിവേചനശേഷിയുല്ലവര്‍ക്ക് അമ്പരക്കാതിരിക്കാന്‍ കഴിയില്ല.
ഭരണഭാഷ മലയാളമാണ് എന്ന് നാഴികയ്ക്ക് നാല്‍പ്പതുവട്ടം പറയുന്ന ഒരു സര്‍ക്കാരിന്റെ കാലത്തുപോലും നേരത്തെ ഉള്ളതാണ് എന്ന് പറഞ്ഞ് ഈ ഭാഷാവിവേചനത്തെ ന്യായീകരിക്കുകയാണ് പി. എസ്.സി അധികൃതര്‍ ചെയ്യുന്നത്. മലയാളമാധ്യമത്തില്‍ ചോദ്യങ്ങള്‍ ചോദിക്കുന്നുണ്ടല്ലോ എന്ന സൗമനസ്യം അല്ല മാതൃഭാഷയ്ക്ക് വേണ്ടത്. അതുകൂടി സമരത്തിലൂടെ നേടിയെടുത്തതാണ് എന്ന യാഥാര്‍ത്ഥ്യം പോലും അപ്പോള്‍ പി എസ് സി മറക്കുകയാണ്. വിദ്യാഭ്യാസ മനഃശ്ശാസ്ത്ര സിദ്ധാന്തങ്ങള്‍ പ്രാഥമിക തലങ്ങളില്‍ മാതൃഭാഷക്കുനല്‍കുന്ന പ്രാധാന്യത്തില്‍ നമ്മള്‍ ഇന്നത്തെതിനെക്കാള്‍ ശ്രദ്ധ മുന്‍പ് നല്‍കിയിരുന്നു. തൊണ്ണൂറുകള്‍ക്ക് മുന്‍പ് കേരളത്തില്‍ പ്രൈമറി ക്ലാസുകളിലെ അധ്യാപകരാകാന്‍ നടത്തിയ പി.എസ്.സി പരീക്ഷയില്‍ 50 ശതമാനം ചോദ്യവും മാതൃഭാഷയില്‍ നിന്നായിരുന്നു. 94നുശേഷം നടന്ന പരീക്ഷകളിലാണ് അത് 20 ശതമാനമായി കുറഞ്ഞത്. കുറച്ച് കാലമായി അത് സമ്പൂര്‍ണമായി ഒഴിവാക്കപ്പെടുന്നു.
മാതൃഭാഷയിലൂടെ വേണം പ്രൈമറി ക്ലാസുകളിലെ പഠനം എന്നാണ് ദേശീയ വിദ്യാഭ്യാസ നയം പറഞ്ഞത്. ഈ സമയത്താണ് പ്രൈമറി ക്ലാസുകളിലെ അധ്യാപക പരീക്ഷാ സിലബസ്സില്‍ നിന്ന് മാതൃഭാഷയെ പുറത്താക്കിയ നടപടി പുനര്‍വിചാരണയ്ക്ക് വരുന്നത്. ഇത് കേവലം സിലബസിന്റെയോ പരീക്ഷയുടെയോ പ്രശ്‌നം മാത്രമല്ല. നാളത്തെ കേരളത്തിന്റെ മനസ്സ് ഈ ദേശത്തിന്റെ സാംസ്‌കാരികവും സാമൂഹികവും സൗന്ദര്യശാസ്ത്രപരവും ആയ പരിസരങ്ങളെ എങ്ങിനെ സ്വാംശീകരിക്കും എന്ന വലിയ ചോദ്യമാണ് ഇതിലൂടെ ഉയര്‍ന്നുവരുന്നത്. മാതൃഭാഷയുടെ വേരുകള്‍ വെട്ടിമാറ്റാനുള്ള നിര്‍ണായക നീക്കങ്ങളാണ് പലതലങ്ങളിലും ആസൂത്രിതമായി നടന്നുവരുന്നത്. ഉദ്യോഗസ്ഥതലങ്ങളില്‍ നടക്കുന്ന പലഉത്തരവുകളും മുന്നണികളും ജനങ്ങളും അറിയുന്നുപോലുമില്ല. മാതൃഭാഷയെ പടിക്ക് പുറത്താക്കുന്ന ഈ നടപടികള്‍ തന്നെയാണ് ഇനിയും തുടരുന്നതെങ്കില്‍ നമ്മുടെ ഭാഷയുടെ മരണത്തിന് കാലം ഇനി അധികം വേണ്ടിവരില്ല.
എന്തുകൊണ്ട് ഇക്കാര്യം ഇപ്പോള്‍ ഉന്നയിക്കുന്നു എന്നത് വിശദീകരിക്കാം. ഒരു വിവേചനം അതർഹിക്കുന്ന ഗൗരവത്തോടെ കൂടി പൊതുസമൂഹം തിരിച്ചറിയുന്ന ഒരു ഘട്ടത്തിലാണ് അതൊരു പ്രശ്നമായി ഉന്നയിക്കപ്പെടുക. മാതൃഭാഷ ഒഴിവാക്കപ്പെട്ട ഘട്ടത്തിൽ പൊതുസമൂഹത്തിന്റെ ശ്രദ്ധയിലേക്ക് ഒരു അധ്യാപക പരീക്ഷ ചിലപ്പോൾ കടന്നു വരണമെന്നില്ല. ഇന്ന് കേരളത്തിലെ ഏതൊരു വിവേചനപരമായ നടപടിയും അത് അർഹിക്കുന്ന ഗൗരവത്തോടുകൂടി തിരിച്ചറിയുന്ന മനുഷ്യാവകാശ /പൗരാവകാശ / ഭാഷാവകാശ പ്രസ്ഥാനങ്ങൾ സജീവമാണ്. നമ്മുടെ സമൂഹത്തിൽ കാലാകാലങ്ങളായി നിലനിന്നിരുന്ന പല വിവേചനങ്ങളും ഒരു പ്രത്യേക ഘട്ടത്തിൽ തിരിച്ചറിയപ്പെടുകയും അതിനെതിരായ പ്രക്ഷോഭങ്ങൾ ഉയർന്നു വരികയും ചെയ്തിട്ടു തന്നെയാണ് അവയെ മറികടക്കാൻ നമുക്ക് സാധിച്ചത്. അത്തരത്തിൽ ഒരു കാലത്ത് പ്രബലമായിരുന്ന ജാതീയവും മതപരവും സാമൂഹികവും ആയ നൂറുകണക്കിന് വിവേചനങ്ങൾ അവസാനിപ്പിക്കുന്നതിന് കേരള സമൂഹത്തിൽ നേതൃത്വം നൽകിയ പാരമ്പര്യമുള്ള പ്രസ്ഥാനങ്ങളാണ് ഇന്ന് നാട് ഭരിക്കുന്നത്. ഏതു ഘട്ടത്തിലായാലും, “അതൊരു വിവേചനമാണ് ” ” നിർബന്ധമായും ഉണ്ടാകേണ്ട ഒന്നാണ് ഒഴിവാക്കപ്പെട്ടത് ” എന്ന് തിരിച്ചറിയുമ്പോൾ അത് തിരുത്തുന്നതിന് ആവശ്യമായിട്ടുള്ള നടപടികളെയാണ് പുരോഗമനപരം എന്ന് പറയുന്നത്. ഭൂതകാല കുളിരിൽ അഭിരമിച്ചു കൊണ്ട് മാത്രം നവോത്ഥാനത്തിൻ്റെ നേരവകാശികളാകാൻ പ്രയാസമാണ്. തിരുത്തലുകൾ വേണ്ടപ്പോൾ അത് ചെയ്യുവാൻ സാധിക്കുന്ന ഒരു ഭരണനേതൃത്വത്തിൽ പ്രതീക്ഷയർപ്പിച്ചു കൊണ്ട് തന്നെയാണ് ഈ മുദ്രാവാക്യം ശക്തമായി ഉന്നയിക്കുന്നത്. കെ എ എസ് ഉൾപ്പെടെ എൽഡി ക്ലർക്ക് പരീക്ഷകൾക്ക് അടക്കം മാതൃഭാഷ ഒരു വിഷയമെന്ന നിലയിൽ സിലബസിൽ ഉൾപ്പെടുത്തുന്നുണ്ടെങ്കില്‍ കുഞ്ഞുങ്ങളെ ഏറ്റവും പ്രധാന്യത്തോടുകൂടി മാതൃഭാഷ പഠിപ്പിക്കേണ്ട അധ്യാപക യോഗ്യതാ നിർണയ പരീക്ഷയിൽ മാത്രം ഇല്ലാതാകുന്നത് എന്തുകൊണ്ടാണ്? മാതൃഭാഷയ്ക്കായി ഒരു ജനത ഒരിക്കലും ചിന്തിക്കരുത് എന്നാണോ പി എസ് സി അധികൃതര്‍ വിചാരിക്കുന്നത്
ഈ സർക്കാറോ ഇപ്പോഴുള്ള പിഎസ് സി യോ അല്ല എൽപി / യുപി പരീക്ഷകളിൽ നിന്നും മലയാളത്തെ മാറ്റിനിർത്തിയത്. മറിച്ച് നിർബന്ധമായും ഈ പരീക്ഷയില്‍ ഉൾപ്പെടേണ്ട മാതൃഭാഷയെ, ആരുടെയോ എന്തൊക്കെയോ നിക്ഷിപ്ത താല്പര്യങ്ങൾ സാധിക്കാനായി മാത്രം ഏറ്റവും നിർണായകമായ ഒരു പരീക്ഷയില്‍ ഒഴിവാക്കിയ നടപടിയെ തിരുത്താന്‍ യാഥാര്‍ത്ഥ്യത്തെ നേര്‍ക്കുനേര്‍ അഭിമുഖീകരിക്കാന്‍ മടിയില്ലാത്ത ഒരു സര്‍ക്കാര്‍ തയ്യാറാകണം എന്നാണ് ഇപ്പോഴത്തെ വാദം. ആരെങ്കിലും ഏതെങ്കിലും കാലഘട്ടത്തിൽ അതിനായി ശബ്ദമുയർത്തിയല്ലേ പറ്റൂ. എല്ലാകാലത്തും ചില പി എസ് സി കൾ ചിലരുടെ കണ്ണിലെ കൃഷ്ണമണികൾ ആയിരിക്കും. ഒരു വിഷയം ബോധ്യപ്പെടുമ്പോള്‍ അതുന്നയിക്കേണ്ട ആദ്യ സന്ദര്‍ഭത്തില്‍ അതുയര്‍ത്തുക എന്നത് സത്യസന്ധതയുടെയും നമമള്‍ നേടിയ ധീരതയുടെയും കൂടി പ്രശ്നമാണ്. അതില്‍ രാഷ്ട്രീയമായ ഉള്ളടക്കം ഒരുതരത്തിലും ഇല്ല. ഏതെങ്കിലും തരത്തില്‍ ഉണ്ടെങ്കില്‍ അത് മാതൃഭാഷയുടെ രാഷ്ട്രീയമാണ്. അതാകട്ടെ എപ്പോഴും ജനാധിപത്യത്തിന്റെയും സാമൂഹിക നീതിയുടെയും പക്ഷത്തായിരിക്കും. ആത്യന്തികമായി ഫാസിസത്തിന് എതിരും.
ഐക്യമലയാള പ്രസ്ഥാനം..ഈ ലിങ്ക് ഓപ്പൺ ചെയ്തു ഹർജി വായിച്ചു നോക്കിയിട്ടു നിങ്ങൾക്ക് ഓണ്‍ലൈന്‍ പരാതി സമര്‍പ്പണ സമരത്തില്‍ പങ്കാളികളാകാവുന്നതാണ് .. നിങ്ങളുടെ സഹകരണം വളരെ അത്യാവശ്യമാണ് ..