ഒരുപിടി വറ്റിനും
തലചായ്ക്കാനൊരു തിണ്ണയ്ക്കും
ഇരന്നെത്തുമ്പോൾ
വീടിനുമുന്നിൽ കാണുന്നു
യാചകനിരോധന മേഖല
സാമ്പാദിച്ച്
കൂട്ടിയിട്ടുണ്ടത്രയും……………
ഹൃദയത്തിൽനിന്ന്
പടിയിറക്കി
മരിപ്പ് കാത്തിരിക്കുന്നു
പ്രിയപ്പെട്ടവർ.
വിറകും കോടിയും കരുതി.
തിരിയും വിളക്കും
എള്ളും പൂവും നാക്കിലയും
വീട്ടിൽതന്നെ ഉണ്ടല്ലോ.
ചിലപ്പോഴെല്ലാം.
ചിറപൊട്ടുംപോലെ പൊട്ടിപ്പോകാറുണ്ട്………..
സ്നേഹത്തിൽനിന്ന്
പടിയിറക്കിവിടുന്ന
ഓരോ മനുഷ്യനും
പ്രാർത്ഥിക്കുന്നുണ്ട്
മരണത്തിലേക്ക് സ്നാനപ്പെടുത്തും
ഒരു നട്ടുച്ചയെ…………………
