വികൃതി വിജയൻ തകൃതിയായി വികൃതികൾ ഒപ്പിക്കുന്ന കുസൃതിക്കുടുക്കയാണ്. മണ്ടൻ കുന്നിന്റെ ഇടവഴികളിലും കുളക്കരകളിലും വിജയൻ അടിച്ച കമന്റുകളും കൗണ്ടറുകളും പ്രതിഫലമായി ലഭിച്ച മുട്ടനടികളും ചരിത്രമായി ഉറങ്ങിക്കിടപ്പുണ്ട്. ഞാനത് വേറൊരിക്കൽ ഉണർത്താം.
ഞാനിപ്പോൾ നിങ്ങളെ വിജയന്റെ FB ചരിത്രത്തിലേക്ക് കൊണ്ട് പോകാം.മണ്ടൻ കുന്നിലെ മൃദുലFB യി ലുണ്ടെന്നറിഞ്ഞ അന്ന് തങ്ങളുടെ പറമ്പിൽ നിന്ന പ്ലാവ് അച്ഛനറിയാതെ കച്ചവടമാക്കി അഡ്വാൻസ് വാങ്ങി ,ഫോണ് വാങ്ങി, സുഹൃത്തിന്റെ സഹായത്താൽ വിജയൻ ഒരുFB അക്കൗണ്ടും തുടങ്ങി.
വയറിളക്കം പിടിച്ചവൻ കക്കൂസിൽ പോകുന്നതും കാര്യം സാധിക്കുന്നതും എത്ര വേഗതയിലാണോ അതിനേക്കാൾ വേഗതയിലായിരുന്നു ഇതൊക്കെ നടന്നത്. SI വിജയൻ എന്ന പേരിലാണ് വിജയൻ അക്കൗണ്ട് തുടങ്ങിയത്.സഹദേവൻ ആൻഡ് ഇന്ദിര മകൻ വിജയൻ ഫ്രം മണ്ടൻ കുന്ന്. അതാണ് …തുടക്കത്തിൽ ഫ്രണ്ട് റിക്വസ്റ്റ് അയക്കലായിരുന്നു വിജയന്റെ പ്രധാന പ്രവർത്തനമേഖല.
കിളികൾക്കായിരുന്നു അപേക്ഷ കൂടുതൽ അയക്കാൻ വിജയൻ താത്പര്യപ്പെട്ടത്.പുരുഷൻമാർക്കും അയക്കുമായിരുന്നു, മൂന്നിലൊന്ന് സംവരണം അത്ര മാത്രം. പുരുഷൻമാരെ തീരെ തഴഞ്ഞുകൂടാ, അവരും ഉയർന്നു വരണം, അതിനാണ് വിജയൻ അവർക്ക് സംവരണം നിശ്ചയിച്ചത്.SI എന്ന ഇൻഷ്യൽ കണ്ട് ഇൻസ്പെക്ടർ ആണെന്ന് തെറ്റിദ്ധരിച്ച് പലരും റിക്വസ്റ്റ് സ്വീകരിച്ചു.
ചിലർ മെസേജ് അയച്ചു ” ഏമാനേ ..ഏത് സ്റ്റേഷനിലാ…?”ചില പുരുഷൻമാരാണ് അയച്ചത്.ഇവൻമാർക്ക് സംവരണം കൊടുത്തിട്ട് ഒരു കാര്യവുമില്ല. മണ്ടൻമാരാ..വിജയൻ അവർക്ക് മറുപടി കൊടുക്കാനൊന്നും പോയില്ല.തുടർച്ചയായ ഈ റിക്വസ്റ്റ് അയക്കൽ ഷുക്കൂർ ബക്കർ ന് ഇഷ്ടമായില്ല. അദ്ദേഹം വിജയന്റെ റിക്വസ്റ്റ് അയക്കുന്ന യന്ത്രം അങ്ങ് ഓഫ് ചെയ്തു.വിജയന് ഉടനെ വന്നല്ലോ കോപം ..!വിജയൻ ഉടനെ തന്നെ പാന്റും ഉടുപ്പും ഇട്ട് വെഞ്ഞാറമൂട്ടിലേക്ക് കുതിച്ചു. അവിടെയുള്ള ‘ഫയസ്ബുക്സി’ലേക്ക് കയറി ചെന്ന വിജയൻ അതിന്റെ ഉടമസ്ഥൻ ഫയസിനെ അതിക്രൂരമായി മർദിച്ചു. “എന്നെ റിക്വസ്റ്റ് അയക്കാൻ നീ സമ്മതിക്കില്ല.. അല്ലേടാ നായേ.. ” വിജയൻ പതിനാല് ലോകവും നടുങ്ങു മാറ് അലറി.
പിന്നെ ദേഷ്യം വരൂലേ..പോലീസ് സ്റ്റേഷനിൽ വച്ചാണ് ഫെയ്സ് ബുക്കും ഫയസ്ബുക്സും രണ്ടാണെന്ന് വിജയന് മനസിലായത്. അപ്പോഴേക്കുംfB യുടെ മുതലാളിയോടുള്ള കോപം വിജയനിൽ തീർന്നിരുന്നു. ഈ പോലീസുകാരെ വച്ച് നോക്കുമ്പോൾ അയാളൊക്കെ ശുദ്ധപാവല്ലേ.. ഇനി വെഞ്ഞാറമൂട്ടിൽ ഇറങ്ങിയാൽ മാമയെക്കൊണ്ട് വെട്ടി കൊല്ലിക്കും എന്ന് ഫയസ് ഭീഷണിപ്പെടുത്തിയതുകൊണ്ട്, വിജയൻ വീട്ടിൽ തന്നെയിരുന്ന് FB യിൽ പലവിധ കേളീ ലീലകളിലേർപ്പെട്ട് സമയം കൊന്നു.വിജയന് ഒരുപാട് ഫ്രണ്ട്സിനെ കിട്ടി, മൃദുലയെ ഒഴിച്ച്.
ഒരുപാട് മെസേജ് അയച്ചിട്ടും സ്വീകരിച്ചില്ല.വിജയന് വളരെ വിഷമമായിപ്പോയി. നിനക്ക് വേണ്ടിയാണ് പെണ്ണേ ഞാനീ നിലാവിന്റെ തീരത്ത് കൊതിയോടെ കാത്തിരിക്കുന്നത്വരില്ലേ നീ വരില്ലേഎൻ പ്രേമ പൂജാപുഷ് മേ..എന്നൊക്കെ കവിത എഴുതി നോക്കി. നോ രക്ഷ..!അല്ലെങ്കിലും ഈ പെമ്പിള്ളാര് നാട്ടുകാരുടെ റിക്വസ്റ്റും സ്വീകരിക്കില്ല അവരുടെ പോസ്റ്റുകളിലും പോകില്ല. അയൽനാട്ടിലുള്ളവരുടെ പോസ്റ്റുകളിൽ ഇവരാടുന്ന മോഹിനിയാട്ടം ഒന്ന് കാണേണ്ടത് തന്നെയാണ്.
ആദ്യകാലത്ത് fB യിൽ വിജയൻ തികച്ചും ശാന്തനും മൗനിയുമായിരുന്നു. എല്ലാം നിർവികാരതയോടെ നോക്കി നില്ക്കും. ആർക്കും ലൈക്കും കൊടുക്കില്ല കമന്റും കൊടുക്കില്ല. അങ്ങനെ വല്ലതും കൊടുത്താൽ താൻ ദരിദ്രനാകും, തന്റെ വീട് പട്ടിണിയായി പോകും എന്ന ഭാവമായിരുന്നു വിജയന് .പ്യൂപ്പാവസ്ഥയിൽ ദീർഘകാലം കഴിഞ്ഞ വിജയൻ പതിയെ പുറന്തോട് പൊളിച്ചുതുടങ്ങി.വിജയനിലെ വികൃതിക്കാരൻ പതിയെ ചിറക് വിടർത്തി പൂമ്പാറ്റയെ പോലെ പറക്കാൻ ആരംഭിച്ചു.ഒരു ദിവസം ഒരു വിദ്വാൻ ഒരു പോസ്റ്റിട്ടു. ‘എല്ലാം വളരെ പെട്ടെന്നായിരുന്നു’എന്താണ് അയാൾ ഉദ്ദേശിച്ചത് എന്ന് അയാൾക്ക് മാത്രമേ അറിയൂ.ഇത് വായിച്ച വിജയനിലെ വികൃതിക്കാരൻ ഉണർന്നു. ഉടനെ വിജയൻ കമന്റിട്ടു.
തന്റെ ആദ്യ കമന്റ്.’ശീഘ്രസ്ഖലനമായിരിക്കും…’ഒരു പാട് തെറി കിട്ടി വിജയന് .തെറി.. അതും വിജയനോട്… ഇതൊക്കെ എത്രമാത്രം കേട്ടിരിക്കുന്നു…പോസ്റ്റ് മുതലാളി തെറി വിളിച്ച് ക്ഷീണിച്ച്, വിജയനെ ബ്ലോക്കും ചെയ്ത് പോയി.അടുത്ത ദിവസം വിജയൻ നോക്കിയപ്പോൾ ഒരു പോസ്റ്റ്, ഒരു കിളിയുടേതാണ്.”ബ്രോസ് .. ബോറടിക്കുന്നു. ഒരു കഥ പറഞ്ഞ് തരുവോ..?”അത് വായിച്ചപ്പോൾ വിജയന് ശരിക്കും സങ്കടം വന്നു പോയി. പാവം പെൺകുട്ടി.. അവളൊരു കഥയല്ലേ ആവശ്യപ്പെടുന്നുള്ളു. എത്രയും പെട്ടെന്ന് കൊടുക്കണം.വിജയൻ ഉടനെ തന്നെ വാട്‌സ്ആപ്പിൽ തനിക്ക് കിട്ടിയ ‘അയൽവക്കത്തെ ചേച്ചി’ എന്ന സെക്സ് കഥകോപ്പി ചെയ്ത് കിളിയുടെ പോസ്റ്റിൽ കമന്റായി ഇട്ടു.പിന്നെയൊരു ബഹളമായിരുന്നു.
കിളിയും കിളിയുടെ കാമുകൻമാരും കൂടി തെറിയോട് തെറി. പത്തിരുപത് പേര് ഒരുമിച്ച് ബ്ലോക്ക് ചെയ്തു. പക്ഷേ കിളിയുടെ പ്രേമം നിഷേധിക്കപ്പെട്ട മറ്റ് ചിലർ വിജയനെ ഇൻബോക്സിൽ വന്ന് വാഴ്ത്തി പാടി സുഖിപ്പിച്ചു. റിക്വസ്റ്റും അയച്ചു.” എന്തോ.. ഒറ്റക്കായതുപോലെ ..” ഇങ്ങനെയൊരു സ്റ്റാറ്റസ് ഒരു ദിവസം വിജയന്റെ കണ്ണിൽ പെട്ടു ,ഒരു പെൺകുട്ടിയാണ്. പാവം പെൺകുട്ടി, എന്തുമാത്രം ഏകാന്തത അനുഭവിക്കുന്നു അവൾ… ഇല്ല കുട്ടീ നീ ഒറ്റക്കല്ല .. വിജയനുണ്ട് ചാരെ ….അന്ന് നേരം വെളുക്കുന്നത് വരെ വിജയൻ അവളുടെ ഇൻബോക്സിൽ കൂട്ടിരുന്നു.
ഞാനുണ്ട് ചാരേകേണിടേണ്ട മോളേതന്നിടാം ഞാൻ മോദംമടിച്ചിടാതെ വാങ്ങൂഇപ്രകാരമുള്ള നൂറ് നൂറ് കവിതകൾ എഴുതി വിജയൻ അവളുടെ ഇൻബോക്സ് നിറച്ചു.നേരം പുലർന്നപ്പോൾ വിജയൻ ഔട്ട്! ബ്ലോക്ക്ഡ്!ഞാനൊറ്റക്കായതുപോലെ… തേങ്ങാക്കൊലയായതുപോലെ എന്നൊക്കെ എഴുതിയിട്ടിട്ട് അവൾ പോയി കൂർക്കം വലിച്ച് ഉറങ്ങി. ഉറക്കമിളച്ചിരുന്ന് ആശ്വസിപ്പിച്ച വിജയനാരായി.. ശശിയായി .. പിന്നെ ബ്ലോക്കനായി … ഇവളെയൊക്കെ തല്ലിക്കൊല്ലണം….!ഒരു പ്രശസ്തൻ ഒരിക്കൽ ഒരു കഥയെഴുതി.വിജയനത് വായിക്കാൻ ശ്രമിച്ചു. ഓ..! കടല് പോലെ കിടക്കുന്നു.തല കറങ്ങുന്നു.വിജയൻ വായന നിർത്തി കമന്റ്കൾ നോക്കി.
നല്ല കമന്റുകളാണ് ലഭിച്ചിരിക്കുന്നത്. അങ്ങനെ വിട്ടാൽ പറ്റില്ലല്ലോ. ഉടനെ തന്നെ വിജയൻ കമന്റി: ഇതൊരു ഇംഗ്ലീഷ് കഥയുടെ കോപ്പിയാണ്..അതിന് ശേഷം വന്നവരെല്ലാം കമന്റിയത് ” ശരിയാ ഇതൊരു ഇംഗ്ലീഷ് കഥയുടെ കോപ്പിയാ” എന്നായിരുന്നു. സമാധാനവും സന്തോഷവും നിറഞ്ഞ ആഭൂമിക ഒരു നിമിഷം കൊണ്ട് വിജയൻ ഒരു കലാപഭൂമിയാക്കി മാറ്റി.എഴുത്തുകാരനും ആരാധകരും കൂടി വിജയന്റെ ഇൻബോക്സിലെത്തി തെറിയായിരുന്നു. അതോടെ വിജയൻ കമൻറടി നിർത്തി.വിജൃംഭകുംഭൻ എന്നൊരു എഴുത്തുകാരനുണ്ട്.
നാളിതുവരെ അയാൾക്ക് ഒരു ലൈക്കോ കമൻറ്റോ വിജയൻ കൊടുത്തിട്ടില്ല.പക്ഷേ അയാളുടെ ടൈം ലൈനിൽ ഇടക്കിടെ പോയി നോക്കും.അയാൾ അഞ്ചാറ് ദിവസം ഒന്നും എഴുതിയില്ലെങ്കിൽ ഉടനെ വിജയൻ ഇൻബോക്സിൽ ചെല്ലും.” സർ ഒരു പാട് ദിവസമായല്ലോ വല്ലതും എഴുതിയിട്ട്.ഞാൻ സാറിന്റെ പുതിയ പോസ്റ്റിനായി കാത്തിരിക്കുന്നു”ഉടനെ തന്ന ആ പാവം കുത്തിയിരുന്നു വല്ലതും എഴുതി പോസ്റ്റ് ചെയ്യും.
എന്നിട്ട് വിജയന് മെസേജും ” ഒരു കഥ എഴുതി പോസ്റ്റിയിട്ടുണ്ട് കേട്ടോ “വിജയൻ ആ മെസേജ് കണ്ടതായി ഭാവിക്കുകയോ കഥ കിടക്കുന്ന ഭാഗത്തേക്ക് പോവുകയോ ചെയ്യില്ല.കുറേ ദിവസം കഴിഞ്ഞ് വീണ്ടും പമ്മി പമ്മി വിജയൻ വിജൃംഭകുംഭന്റ ടൈം ലൈനിലേക്ക് ചെല്ലും. പുതിയ പോസ്റ്റ് കണ്ടില്ലെങ്കിൽ ഉടനെ ഇൻബോക്സിലേക്ക് പായും” സാറെന്താ എഴുതാത്തത്… സാറിന്റെ കഥ വായിച്ചില്ലേൽ എനിക്കെന്തോ പോലെയാ.. “ഉടനെ തന്നെ വിജൃംഭകുംഭൻ ഉറക്കമിളച്ചിരുന്ന് എഴുതി പോസ്റ്റും.എന്നിട്ട് അക്കാര്യം വിജയനെ അറിയിക്കും.വിജയൻ അത് മൈൻഡേ ചെയ്യില്ല.
ഹും.. കഥ വായിക്കാൻ പോകുന്നു .. നല്ല കഥ!വീണ്ടും കുറേ നാൾ കഴിഞ്ഞ് പമ്മിപമ്മി കഥാകാരന്റെ ടൈം ലൈനിൽ ചെന്ന് ഒളിഞ്ഞ് നോക്കും. എന്നിട് മെസേജയക്കും.ഇത് കുറേ നാൾ ആവർത്തിച്ചപ്പോൾ ഒരു ദിവസം കഥാകാരൻദേഷ്യം വന്ന് അലറി:എഴുതാൻ എനിക്ക് മനസില്ലടാ.. നീ കൊണ്ട് പോയി കേസ് കൊടുക്ക്…! എന്നും പറഞ്ഞ്സ്വന്തം അക്കൗണ്ടും ഡീആക്ടീവേറ്റ് ചെയ്ത് വിജൃംഭ കുംഭൻ എങ്ങോട്ടോ പോയി ..
ഇങ്ങനെയുള്ള ഒരു പാട് പേരുടെ പ്രാക്ക് അന്തരീക്ഷത്തിൽ കിടന്ന് കറങ്ങുന്നതിന്റെ പരിണിത ഫലമാണോ എന്തോ, ഒരു ദിവസം FB യിലെ തന്റെ മുറിയിലേക്ക് കേളീ വിലാസ മാടാൻ ചെന്ന വിജയൻ തന്റെ മുറി പൂട്ടിക്കിടക്കുന്നതായി കണ്ടു.ഷുക്കർ ബക്കർ തന്റെ മുറി പൂട്ടിക്കളഞ്ഞു.ഹും ആർക്കു വേണം ഇവിടത്തെ ഈ കുടുസുമുറി.
ഈ മുറി കൊണ്ട് എന്തുപയോഗമാണ് .. തെറി പറയാനല്ലാതെ ഒരു പെണ്ണും ഈ മുറിയിലേക്ക് വന്നിട്ടില്ലല്ലോ .. പിന്നെ എനിക്കെന്തിനീ മുറി… ഇതിനേക്കാൾ നല്ലതാണല്ലോ തേങ്ങാമുറി .. ചമ്മന്തിയെങ്കിലും അരക്കാമല്ലോ. എനിക്കു വേണ്ട ഈ എലിപ്പൊത്ത്… ഇതിന് വാടക തരാനും കാശില്ല.. ഇനി ഒരിക്കലും ഇങ്ങോടില്ല ..എന്നൊക്കെ പിറുപിറുത്തിട്ട് വിജയൻ ഫോണെടുത്ത് നമ്പർ കുത്തി. എന്നിട്ട് ഇങ്ങനെ സംസാരിച്ചു.” ഹലോ ശശി മേശിരിയല്ലേ.. നാളെ വാർക്കപ്പണിയുണ്ടോ.? നാളെ മുതൽ ഞാനും വരട്ടെ..?”
ശിവൻ മണ്ണയം.