രചന : രാജു കാഞ്ഞിരങ്ങാട്
ഇരുമുലകളുമാട്ടിയാട്ടി
ഊന്നുവടിയും കുത്തിക്കുത്തി
ആവഴിയെ നടന്നു പോകുമെന്നുമാമുത്തശ്ശി
മുലസമരങ്ങളവസാനിച്ചിട്ടും
മുലക്കരം നിർത്തിയിട്ടും
മാറു മറയ്ക്കാമെന്നു വന്നിട്ടും
മുല മുറിച്ചത്
കവലപ്രസംഗവും
ചിത്രപ്രദർശനവുമായിട്ടും
കഴിഞ്ഞകാലത്തിൻ്റെ
ചരിത്രശേഷിപ്പുപോലെ
തുളളിക്കളിക്കുന്ന മുലകളെ മുയൽക്കുഞ്ഞുങ്ങളപ്പോലെ
മേഞ്ഞു നടക്കാൻ വിട്ട്
തലയുയർത്തി നടന്നു മുത്തശ്ശി
ആൺനോട്ടങ്ങളേക്കാൾ
പെൺനോട്ടങ്ങളാണ്
ആ മുഴുത്ത മുലകൾക്ക് കൂടുതലായി
ഏറ്റുവാങ്ങേണ്ടി വന്നിട്ടുള്ളത് !
അശ്ലീല നോട്ടങ്ങൾ
ആശ്ചര്യനോട്ടങ്ങൾ
നാണിച്ച നോട്ടങ്ങൾ
മുത്തശ്ശിക്ക്മാത്രം ഒരു കുലുക്കവുമില്ല
മാറുമറയ്ക്കാൻ തോന്നിയിട്ടുമില്ല
ഒർമ്മവെച്ച നാൾമുതൽ കാണുന്നതാണ്
മരിക്കുന്നതുവരേയും മുത്തശ്ശിക്കൊരേ –
പ്രായമായിരുന്നു
ഇന്ന്, തൊടിയിലെ വരിക്കപ്ലാവിലെ
ഞാന്നുകിടക്കുന്ന ചക്കകാണുമ്പോൾ
മനസ്സിൽ മുളയിട്ടുണരുന്നത്
ആ മുത്തശ്ശിയുടെ മുഴുത്ത മുലകളാണ്.
