🍸 വൈൻ ഓഫ് വിസ്ഡം 🍸 🍾…. Sudev Vasudevan

ഒമർഖയാം ജീവിതവീഞ്ഞു വീണ്ടും
നിറയ്ക്കുുകെൻസ്ഫാടികപാനപാത്രം
പതഞ്ഞുപൊന്തട്ടേ ! ലയിച്ചിടട്ടേ !
വരണ്ടചുണ്ടാലതുമുത്തിടട്ടേ !

നിലച്ചുകാലം ! ഇനിവർത്തമാനം !
പറഞ്ഞിരിക്കാം കവിതാരഹസ്യം
വിരുന്നുകാർ നമ്മളകന്നുപോകും
വിദൂരപാതയ്ക്കൊടുവിൽ ചിലപ്പോൾ

വിഷാദമേറുന്നൊരു മൗനമപ്പോൾ
നിറയ്ക്കുമെൻ കാസ ശരാബിനായി
നിസർഗ്ഗരാഗത്തൊടുപാടിടൂനീ
നിലാവിലെൻശായരിയൊന്നുകൂടി

നിഹാരബിന്ദുക്കൾ തുടച്ചിടേണ്ടാ
വിശാലമാം നീർമ്മിഴി ചിമ്മിടേണ്ടാ
നികുഞ്ജമാകാശമതുറ്റുനോക്കാം
ശബാബ് നീ വന്നരികത്തിരിയ്ക്കൂ

അചുംബിതോല്ലേഖനമൊന്നുമില്ല
ബലിഷ്ഠമാം ദർശനഗീതിയില്ലാ
വിശുദ്ധമാം ബുദ്ധിയിൽവന്നുദിക്കും
വിചാരവിശ്ലേഷതരംഗമില്ലാ

അപൂർവ്വമായെന്റെയടുത്തിരിക്കും
വികാരമാത്മാവുഗ്രഹിച്ചിടുന്നു
വിഭാതമേയെൻ മിഴിക്കുനൽകൂ
മിനുങ്ങുസൗന്ദര്യനിദർശനങ്ങൾ

കുലീനമെൻലജ്ജമറച്ചിടട്ടെ
വിരൂപമാകുന്നവിഷാദമെല്ലാം
ഒമർഖയാം ആത്മനിവേദനം ഞാ
നവൾക്കിതേകുന്നതു സാക്ഷിയാകൂ !

സുദേവ് ബി