🔥 മുറിവേറ്റവർ 🔥

സെഹ്റാൻ*

എന്നാൽ മുറിവേറ്റവരാകട്ടെ
അതെക്കുറിച്ച് നിശബ്ദരായിരിക്കുന്നു.
ഇരുളിന്റെ തകർന്ന കണ്ണാടിച്ചില്ലുകളിലെ
പ്രതിബിംബങ്ങളോട് സംവദിക്കുമ്പൊഴും
വിദഗ്ധമായവരാ മുറിവുകളെ
മറച്ചുപിടിക്കുന്നു.
വിണ്ടുപൊളിഞ്ഞ വീഥികളുടെ
ഓരങ്ങളിൽ തീക്കുണ്ഡങ്ങളൊരുക്കി
അവർ മുറിവുകൾക്ക്
ചൂടുപിടിപ്പിക്കുന്നു.
മഞ്ഞുകാലങ്ങളിലവർ ഒഴിഞ്ഞ
പക്ഷിക്കൂടുകളിൽ തങ്ങളുടെ
ഏകാന്തതയെ നിക്ഷേപിക്കുന്നു.
മരങ്ങൾ ഇലപൊഴിക്കുന്ന കാലത്ത്
അവയുടെ വേരറ്റങ്ങളിൽ
അവരുടെ വിയർപ്പുതുള്ളികൾ
ചേക്കേറുന്നു.
മുറിവുകൾ അപ്പോഴും പക്ഷേ
ഉണങ്ങാതിരിക്കുന്നു.
മുറിവുകളെക്കുറിച്ചവർ നിശബ്ദരായിരിക്കുന്നു…
അത്രമേൽ അവരാ മുറിവുകൾക്കുള്ളിലേക്ക്
പൂണ്ടിറങ്ങിപ്പോയതിനാലാവാം
നേർത്തൊരു വിലാപം മാത്രം
നിശബ്ദതയെ ഭഞ്ജിച്ച് ഇപ്പോഴും
അന്തരീക്ഷത്തിൽ തങ്ങിനിൽക്കുന്നത്…