💧 തൃക്കേട്ടയുടെ തപ്താരവം💧

രചന : കൃഷ്ണമോഹൻ കെ പി ✍

കേട്ട ഞാൻ ഭഗവതി, ലക്ഷ്മി തൻ സഹോദരി
ജ്യേഷ്ഠയാണെന്നാലെന്നെ, തൃക്കേട്ടയെന്നും ചൊല്ലും
കേട്ടാലുമില്ലെങ്കിലും, മാനുഷജന്മത്തിൻ്റെ
കേടുകളോർമ്മിപ്പിക്കാൻ ഞാനുണ്ടു സദാകാലം
കോട്ടമില്ലതുകൊണ്ടു, കേട്ടുതാൻ ജീവിക്കുകിൽ
കോട്ടങ്ങളൊഴിവാക്കാൻ തൃക്കേട്ടയുണ്ടെപ്പോഴും
കേൾക്കണം, “തിരു”വെന്ന ദ്വയാക്ഷരങ്ങൾ നിങ്ങൾ
കേൾക്കാലോ” തിരുമേനി”യെന്നതും കണ്ടീടണം
കാഴ്ചയ്ക്കു ഭംഗിയ്ക്കായി “തിരു”കേട്ടയെന്നെൻ പേരോ
കാർമ്മികർ ഗുരുക്കന്മാർ തൃക്കേട്ടയെന്നും മാറ്റീ
കാർത്തിക, തൃക്കാർത്തികയായതുപോലേയെന്നെ
കേട്ടയെന്നൊഴിവാക്കി, തൃക്കേട്ടയാക്കീ ഭൂതർ
കാലഘട്ടത്തിന്നൊരു മാറ്റമായെത്തീടുമെൻ
കാരണ കർത്തവ്യങ്ങൾ അറിയൂ ജീവജാലം
കാലനല്ലൊരിയ്ക്കലും, കാലിയുമല്ലായെൻ്റെ
കർത്തവ്യമനുദിനമനുഷ്ഠിക്കുന്നൂ, ശ്രീമൻ
കാലഘട്ടങ്ങൾ തൻ ഓർമ്മക്കുറിപ്പിന്മേൽ
കാതര;പ്രപഞ്ചത്തിൽ നില്ക്കുന്നൂ തൃക്കേട്ട ഞാൻ
കാലുകളിടറുന്ന പൈതങ്ങൾ തൻ മുന്നിലും
കാലുകളുറയ്ക്കാത്ത വൃദ്ധർ തന്നോർമ്മയിലും
കാലത്തിൻ പ്രയാണത്തിൻ ഓർമ്മകൾ വിതറും ഞാൻ
കലാതിവർത്തിയായി, യുവത്വത്തെയോർമ്മിപ്പിക്കും
കാമന കണ്ടെത്തീടും, കവികളീയെന്നേയെന്നും
കാമ്യയായ് പ്രതിഷ്ഠിപ്പൂ, അവരുടെ മനസ്സിങ്കൽ
കലകൾ തൻ മഹോന്നത വീഥിയിൽ രമിയ്ക്കുന്ന
കലഹരഹിതയാകും, തൃക്കേട്ട ഓണങ്ങളിൽ….💦