🐝ചതയം ചതയുന്നു ചിന്തിതചിത്തത്തോടേ..🐝

രചന : കൃഷ്ണമോഹൻ കെ പി ✍

ചതഞ്ഞു ചതഞ്ഞു ചതഞ്ഞുതന്നെചതയമീ ഭുവനത്തിൻ
ചമത്ക്കാരമെല്ലാം കണ്ടുചരിക്കുന്നു, മൂകാത്മാവായ്…
ചാലകശക്തിയേകും, വചനങ്ങൾ ചൊല്ലീടുന്നൂ
ചാരേ നിന്നുപദേശം, പിന്നെയും നല്കീടുന്നൂ
ചിന്തയിൽ സത് ഭാവനയുണ്ടാക്കാൻ ചിരം ചിരം
ചിത്രങ്ങൾ പതിച്ചു താൻ, ചതയം മുന്നേറുന്നു
ചീത്തയും, ചീമുട്ടയും, കൈകളിൽക്കരുതാതെ
ചെമ്മേയാ മനസ്സിൻ്റെ താളലയങ്ങൾ തന്നിൽ
ചൈതന്യമുത്തുക്കളെ, അണിയിച്ചങ്ങുണർത്തുവാൻ
ചൊല്ലുന്നൂ ഭാവാന്വിത വാക്കുകളെന്നും.. കാണ്മൂ
ചോദ്യങ്ങളനവധി, മനസ്സിൽ കിടക്കുമ്പോൾ,
ചർവിത ചർവിതമാം വാക്കുകൾ ശ്രവിക്കുമ്പോൾ
ചഞ്ചലചിത്തരാകും, മാനവ മനോഭാവം
ചന്തത്തെക്കണ്ടീടില്ല,ചതുരംഗക്കളങ്ങളിൽ
ചിന്തകൾ നന്നാക്കീടാൻ, ചതയത്തിൽ പിറന്ന, ശ്രീ,
ചിന്മയൻ നാരായണ, ഗുരുചൊന്നതും മഹത്തല്ലേ
ചതയത്തിൻ മനസ്സിൻ്റെയരികത്തു ചെന്നെത്തീടാൻ
ചപലരാം, മനുഷ്യർക്കു കഴിയില്ലയതും സത്യം
ചതയമീ ദിനത്തിൻ്റെ മാഹാത്മ്യമുൾക്കൊണ്ടിട്ട്
ചതിയ്ക്കാതെ മുന്നേറീടാം ചാരുതയുൾക്കൊണ്ടീടാം…
🖋️✍️