🌑കാലരാത്രിയിലെ,കാളി🌑

രചന : കൃഷ്ണമോഹൻ കെ പി ✍

യാ ദേവി സർവഭൂതേഷു മാ
കാളരാത്രി രൂപേണ സംസ്ഥിതാ
നമസ്തസ്യൈ , നമസ്തസ്യൈ
നമസ്തസ്യൈ , നമോ നമ:*
കാർവർണ്ണമുൾക്കൊണ്ടു കാമസ്വരൂപിണി
കാളീ മഹാരുദ്രഭാവയായീ
ജടാധാരിയായി, ഭയാനകരൂപമായ്
ജാതയായ് ഭൂവിൽ തൃക്കണ്ണുമായ്
വാമകരങ്ങളനുഗ്രഹമേകുന്നു
ദക്ഷിണ ഹസ്തങ്ങൾ ശിക്ഷിക്കുന്നൂ
ആശീർവദനവും, ആനന്ദവും സദാ
ആ നാലു കയ്യിൽ വഹിപ്പു മാതാ
രക്തബീജൻ തന്നെ മൃത്യു ലോകത്തിങ്കൽ
രക്താഭിഷിക്തനായ് കൊണ്ടു പോയീ
ഗർദ്ദഭവാഹനമേറിച്ചരിച്ചു നീ
ഗർവ്വങ്ങളൊക്കെയടക്കിടുന്നൂ
ശക്തൻ,ശിവൻ, കാലകാലേശ്വരനായി
ശക്തി സ്വരൂപ നീ കാളിയായീ
സൃഷ്ടിസ്ഥിതിലയ കർമ്മങ്ങളിൽ മഹദ്
സാന്നിധ്യമായ് നീ നിറഞ്ഞു നില്പൂ
കാളീ, മഹാകാളികാലസ്വരൂപിണി
കാളിയേഴാംദിന മാതൃത്വമേ
കാലടി മെല്ലെത്തൊഴുതങ്ങുമേവുന്നു
കാലങ്ങളെല്ലാം നിനക്കു മുന്നിൽ🙏🙏🙏