🫵നാടകമീ ജീവിതം👂🏽

രചന : കൃഷ്ണമോഹൻ കെ പി ✍️

ഏകാങ്കമാണെടോ ജീവിതമെന്നുമേ
ഏകനായ് നിന്നങ്ങഭിനയിക്കാം
ഏതോ വികല്പത്തിന്നേകാന്തചിന്തയിൽ
ഏവർക്കും തോന്നിടും നാടകമായ്
നാടകം സാമൂഹ്യ ചിന്ത തന്നുൾവിളി
നാട്യ പ്രധാനമായ് നിന്നിടുന്നൂ
ഒറ്റവരിയിലെ പദ്യ ശകലം പോൽ
ഏകാങ്കമെന്നും നിറഞ്ഞു നില്പൂ
ഓർക്കുക കൈവല്യ ധാരയതേല്ക്കുവാൻ
ഓരോ നിമിഷവും വെമ്പിടുന്നൂ
ഓർമ്മയിലെത്തുന്ന ഓരോ പ്രവൃത്തിയും
ഓളങ്ങൾ തീർക്കും മനസ്സിനുളളിൽ
ഞാനില്ല, നീയില്ല, നാനാ സ്വരമില്ല
ഞായറും തിങ്കളും സാക്ഷിയത്രേ
ഞാനൊന്നുമല്ലെന്ന തോന്നലുണ്ടാകുമ്പോൾ
ജ്ഞാനസ്ഥരാകുന്നു ജീവജാലം
ഇന്നീ നിമിഷത്തിലാടാൻ കഴിയുന്ന
ഇഷ്ടഭാവ പുഷ്ട വേഷങ്ങളെ
ഇച്ഛയോടങ്ങനെ ചെയ്തു തീർത്തീടുകിൽ
ഇജ്ജന്മം സാഫല്യമാർജ്ജിച്ചിടും
ഇന്നലെയെന്നതു പണ്ടേ കഴിഞ്ഞു പോയ്
ഇന്നെന്ന സത്യം നിറഞ്ഞു നില്ക്കും
നാളെയെന്നുള്ളൊരു സ്വപ്നത്തിൻ മുന്നിലീ ‘
നാടകത്തിൻ്റെ, പടുത താഴും🤡