🌿 പാ ലാ ത ങ്ക ച്ച ൻ🌿

രചന : സന്തോഷ് കുമാർ ✍️

ദക്ഷിണേന്ത്യയിലെ അറിയപ്പെടുന്ന മോട്ടോർസൈക്കിൾ അഭ്യാസിയാണ് പാലാ തങ്കച്ചൻ .കർണാടക , തമിഴ്നാട് , ആന്ധ്രപ്രദേശ് എന്നീ സംസ്ഥാനങ്ങളിലെ കുഗ്രാമങ്ങളിൽ വരെ അദ്ദേഹത്തിന് ഇന്നും ആരാധകരുണ്ട് .
മോട്ടോർ സൈക്കിളിലേക്ക് ചേക്കേറുന്നതിനുമുമ്പ് തങ്കച്ചന് , സൈക്കിളിൽ അഭ്യാസം നടത്തിയിരുന്ന ഒരു പൂർവ്വകാലമുണ്ട് .

സൈക്കിൾയജ്ഞം എന്ന് വിളിപ്പേരുള്ള ആ പരിപാടിയുമായി അദ്ദേഹവും കൂട്ടരും കേരളമാകെ ചുറ്റിയടിച്ചു നടന്നു .
തലമുടിയിൽ കെട്ടി ജീപ്പു വലിക്കുക , നെഞ്ചത്തു വച്ച ആട്ടുകല്ലിൽ അരിയാട്ടുക ,
മണ്ണിൽ ഉണ്ടാക്കിയ കുഴിയിൽ മണിക്കുറുകളോളം അടക്കം ചെയ്തു കിടക്കുക ..തുടങ്ങിയ നിരവധി പരിപാടികൾ . അക്കാലത്തെ സഹയാത്രികയായിരുന്ന ഏലമ്മയാണ് പിന്നീട് തങ്കച്ചൻ്റെ ജീവിത സഖിയായതും !
ഈ വിധ പരിപാടികൾ നടത്തിയിരുന്ന ആരംഭകാലത്താണ് തങ്കച്ചൻ കല്ലറ ഗ്രാമത്തിൽ എത്തിയത് . 1968 ൽ …

അന്ന് നാട്ടുകാർക്ക് സൈക്കിൾയജ്ഞം എന്താണെന്ന് അറിയില്ലായിരുന്നു .
കല്ലറയിൽ ആഴ്ചചന്ത നടന്നിരുന്ന പ്രദേശമാണ് യജ്ഞത്തിന് തെരഞ്ഞെടുത്തത് .
ഇന്ന് യൂണിയൻ ബാങ്ക് സ്ഥിതി ചെയ്യുന്ന കെട്ടിടത്തിനു പുറകിലുള്ള പുരയിടത്തിൽ . അക്കാലത്ത് ആഴ്ചയിലെ ബുധൻ , ശനി ദിവസങ്ങളിലാണ് ചന്ത നടന്നിരുന്നത് .
സൈക്കിൾയജ്ഞം നടക്കുന്നതിനാൽ രണ്ടാഴ്ചത്തേക്ക് ചന്തയുടെ പ്രവർത്തനം പരിമിതപ്പെടുത്തിയിരുന്നു .

വൃത്താകാരത്തിൽ വേദിയൊരുക്കി , അതിരുകളിൽ ബലമുള്ള കമ്പുകൾ ഉറപ്പിച്ച് , അവതമ്മിൽ കയർകെട്ടി അതിരു തിരിച്ചു . ജനങ്ങൾ ചുറ്റും നിന്ന് പരിപാടികൾ കാണുകയാണ് ചെയ്യുന്നത് .
ആരംഭദിവസം മുതൽ യജ്ഞം അവസാനിക്കുന്ന ദിവസം വരെ ട്രൂപ്പിലെ ഒരാൾ , വൃത്താകാരത്തിലുള്ള കളത്തിലൂടെ സദാസമയവും സൈക്കിളിൽ കറങ്ങിക്കൊണ്ടിരിക്കും .
ഈ കറക്കം നടന്നുകൊണ്ടിരിക്കുമ്പോൾ തന്നെ വേദിയിൽ മറ്റു പരിപാടികളും നടക്കും.

പ്രധാനമായും , ഹാസ്യനാടകം , റിക്കോർഡു ഡാൻസ് , സൈക്കിളിലും അല്ലാതെയുമുള്ള അഭ്യാസപ്രകടനം മുതലായവ ……
സൈക്കിളിൽ തങ്കച്ചൻ നടത്തിയിരുന്ന പ്രകടനം അതുല്യമെന്നു തന്നെ പറയാം ..
അക്കാലത്ത് അപൂർവ്വം കലാപരിപാടികൾ മാത്രം നടന്നിരുന്ന ഒരു നാട്ടിൻപുറമായിരുന്നു കല്ലറ !
ദേവാലയങ്ങളിലെ ഉത്സവപ്പരിപാടികളും
ഓണം , ക്രിസ്മസ് വേളകളിൽ നാട്ടുകാർ നടത്തുന്ന കലാപരിപാടികളും മാത്രമായിരുന്നു ആഘോഷങ്ങൾ …
ഇപ്രകാരം ആഘോഷങ്ങളിലെ ആവർത്തനം കണ്ടു ശീലിച്ച നാട്ടുകാരുടെ ഇടയിലേക്കാണ് സൈക്കിൾയജ്ജം എന്ന വ്യത്യസ്ത കലാപരിപാടിയുമായി പാലാ തങ്കച്ചൻ കടന്നുവന്നത് .

നാട്ടുകാർ സംഘത്തെ ഇരുകയ്യും നീട്ടി സ്വീകരിച്ചു .
കളി തീരുന്നതിന് തലേദിവസം തങ്കച്ചൻ അവതരിപ്പിച്ച പരിപാടി നാടിനെ ഇളക്കിമറിച്ച ഒന്നായിരുന്നു .
കല്ലറയും പെരുന്തുരുത്തും തമ്മിൽ അതിരിടുന്ന ചുങ്കം തോടിൻ്റെ കിഴക്കേ ആറ്റത്തു നിന്നും തുടങ്ങി പെരുന്തുരുത്തിലെ പാറശ്ശേരിൽ താഴെ വരെ വെള്ളത്തിലൂടെ സൈക്കിളിൽ സഞ്ചരിക്കുക
എന്ന അപൂർവ പരിപാടി ആയിരുന്നു അത് !!
തോടിൻ്റെ ഇരുകരകളിലും തിങ്ങി നിറഞ്ഞ കാണികളെ വിസ്മയിപ്പിച്ചു കൊണ്ട് അദ്ദേഹം വെള്ളത്തിലൂടെ സൈക്കിളിൽ മുന്നോട്ടു പൊയ്ക്കൊണ്ടിരുന്നു .
കാലിയാക്കിയ പ്ലാസ്റ്റിക് കന്നാസുകൾ മുൻ-പിൻ ചക്രങ്ങളുടെ ഇരു വശങ്ങളിലും കെട്ടിയുറപ്പിക്കുന്നതിനാൽ സൈക്കിൾ വെള്ളത്തിൽ പൊങ്ങിനിൽക്കും .
പിന്നിലെ ചക്രത്തിൻ്റെ ടയർ ഒഴിവാക്കി , നീളം കുറഞ്ഞ മെറ്റൽ പ്ലേറ്റുകൾ റിമ്മിൽ വെൽഡു ചെയ്തു പിടിപ്പിക്കുന്നു . സൈക്കിളിലിരുന്നു പെഡൽ ചവുട്ടിക്കറക്കുമ്പോൾ , റിമ്മിലെ ഇലച്ചക്രങ്ങൾ വെള്ളത്തെ പിന്നോട്ടു തള്ളുകയും , അതിൻ്റെ പ്രതിബലത്താൽ സൈക്കിൾ മുന്നോട്ടു നീങ്ങുകയും ചെയ്തിരുന്നു .

ഈ ശാസ്ത്രീയബോധം അന്നത്തെ കാണികൾക്ക് കുറവായിരുന്നതിനാൽ അവർക്ക് അതൊരു അത്ഭുതക്കാഴ്ചയായിരുന്നു .
അക്കാലത്ത് കല്ലറയെയും പെരുന്തടരുത്തിനെയും തമ്മിൽ ബന്ധിപ്പിക്കുന്ന പാലം ഉണ്ടായിരുന്നില്ല .
ആറ്റിങ്ങൽ ഗോപി എന്ന സൈക്കിൾയജ്ഞക്കാരനോടുള്ള ആരാധന മൂത്താണ് , പാലാ തങ്കച്ചൻ തൻ്റെ പന്ത്രണ്ടാം വയസ്സിൽ സൈക്കളഭ്യാസി ആയത് .
പാലാ സെൻ്റ്തോമസ് സ്കൂളിലെ എട്ടാംക്ലാസ് വിദ്യാർത്ഥി ആയിരുന്നു അന്ന് തങ്കച്ചൻ .
മാസ്റ്റർ കെ എഫ് തങ്കച്ചൻ എന്ന സൈക്കിൾ അഭ്യാസിയിലേക്ക് തങ്കച്ചൻ പരകായം കൊണ്ടു .

കള്ളുഷാപ്പു നടത്തിയിരുന്ന പിതാവ് ഫ്രാൻസിസ് അതിനകം തന്നെ തങ്കച്ചന് പല തരത്തിലുള്ള മൂന്നു സൈക്കിളുകൾ വാങ്ങി നൽകിയിരുന്നു .
ചെക്കൻ പള്ളിക്കുടത്തിൽ പോകട്ടെയെന്നു കരുതി .
എന്നാൽ ആറ്റിങ്ങൽ ഗോപിയാശാനെ മനസ്സാ ഗുരുവായി സ്വീകരിച്ച തങ്കച്ചന് ക്ലാസ്സുമുറിയിൽ ഇരിക്കാൻ കഴിഞ്ഞില്ല .അങ്ങനെ പാലായിലെ ചാഞ്ഞപുഞ്ച മൈതാനത്ത് തങ്കച്ചൻ്റെ ആദ്യ അഭ്യാസപ്രകടനം അരങ്ങേറി .
പക്ഷെ അതിനു വലിയ വിലകൊടുക്കേണ്ടി വന്നു . സ്കൂളിൻ്റെ നോട്ടീസ് ബോർഡിൽ തൻ്റെ പരിപാടിയുടെ അറിയിപ്പ് എഴുതി ഒട്ടിച്ചതിന് ഹെഡ്മാസ്റ്റർ തങ്കച്ചന് നല്ല ചൂരൽക്കഷായം കൊടുത്തു .

അതോടെ ഇനി പള്ളിക്കുടത്തിലേക്കില്ല എന്നു തങ്കച്ചനങ്ങ് തീരുമാനിച്ചു .
അന്നത്തെ സൈക്കിളഭ്യാസിയായ പയ്യൻ വളർന്ന് ത്രസിപ്പിക്കുന്ന യൗവ്വനത്തിൽ , മോട്ടോർസൈക്കിളിൽ കേരളമാകെ സഞ്ചരിച്ച് അഭ്യാസങ്ങൾ കാണിച്ചു .
തങ്കച്ചൻ്റെ കിടിലൻ അഭ്യാസങ്ങൾ കണ്ട് ആളുകൾ അത്ഭുതത്തോടെ കണ്ണുതള്ളി കണ്ടു നിന്നു . കേരളംവിട്ട് തമിഴ്നാട്ടിലെ പൊള്ളാച്ചിയിലും , ഡിണ്ടിഗലിലും മധുരയിലും നാഗർകോവിലിലുമെല്ലാം തങ്കച്ചനും ബൈക്കും പ്രശസ്തി നേടി .കർണാടകയിലെ കുഗ്രാമങ്ങളിൽ ഇന്നും തങ്കച്ചന് ഫാൻസ് ഉണ്ടെന്ന് അദ്ദേഹം പറയുന്നു .
പാലാ തങ്കച്ചന് ഇപ്പോൾ വയസ് 73 . തൻ്റെ ശരീരത്തിൻ്റെ ഭാഗമായി മാറിക്കഴിഞ്ഞ ‘ ജാവാ ‘ മോട്ടോർസൈക്കിളിനും ഏതാണ്ട് അതിനോട് അടുത്ത പ്രായമായിട്ടുണ്ടാകുമെന്നാണ് തങ്കച്ചൻ്റെ കണക്കുകൂട്ടൽ !!

1956 മോഡൽ ജാവായാണ് ഈ അഭ്യാസിയെയും കൊണ്ട് ഇന്നും ആൾക്കൂട്ടത്തെ വിറകൊള്ളിച്ച് പായുന്നത് . കഴിഞ്ഞ നാല്പതിലേറെ വർഷമായി മെരുക്കമുള്ള ഇരുമ്പുമൃഗത്തെപ്പോലെ തോന്നിക്കുന്ന ഈ ബൈക്കിൻ്റെ പുറത്താണ് തങ്കച്ചൻ്റെ ജീവിതം . ഈ പ്രായത്തിലും തൻ്റെ തെരുവു മോട്ടോർസൈക്കിൾ പ്രകടനം തുടരുന്നു .
ബൈക്കിൻ്റെ പുറത്താണ് തങ്കച്ചൻ്റെ ജീവിതം എന്നു പറഞ്ഞാൽ പൂർണ്ണമായും ശരിയാകില്ല . എന്തെന്നാൽ തങ്കച്ചൻ്റെ യാത്ര ചിലപ്പോൾ ഹാൻഡിലിൽ കയറി ഇരുന്നു കൊണ്ടാകും . അല്ലെങ്കിൽ ചിലപ്പോൾ ഫുട് റെസ്റ്റിനും ക്രാഷ് ഗാർഡിനും ഇടയിലുള്ള ഇത്തിരി സ്ഥലം ഇരിപ്പിടമാക്കിക്കൊണ്ടാകും .

കേരളത്തിൻ്റെ ഗ്രാമങ്ങളിലും ചെറുപട്ടണങ്ങളിലുമെല്ലാം എത്ര തിരക്കുള്ള റോഡിലും ഒരു സുരക്ഷാ മുൻകരുതലുമില്ലാതെ തങ്കച്ചൻ ഇങ്ങനെ ഇരുന്നു കൊണ്ടു പ്രവേശിക്കും .
പെട്ടെന്നുള്ള ആ വരവും പ്രകടനവും ആളുകളെ ഹരം കൊള്ളിക്കും .
സൈലൻസർ ഊരി വച്ച ജാവായുടെ പരുക്കൻ ശബ്ദം , തങ്കച്ചൻ്റെ വരവ് അറിയിക്കുന്ന അടയാളമാണ് . അതോടെ ജനങ്ങൾ അക്ഷമരായി റോഡിന് ഇരുവശവും കാത്തു നിൽക്കുകയായി .
ആദ്യ റൗണ്ടിൽ എല്ലാവരെയും നോക്കി ചിരിച്ചു കൈവീശി കടന്നുപോകുന്ന തങ്കച്ചൻ തിരിച്ചു വരുന്നത് ചീറിപ്പായുന്ന ബൈക്കിൽ എഴുനേറ്റു നിന്ന് കൈകൂപ്പിക്കൊണ്ടാകും .
പിന്നീടു നമ്മൾ കാണുന്നത് ബൈക്കിൻ്റെ സൈഡിലിരുന്ന് പത്രം വായിച്ചുകൊണ്ടുവരുന്ന തങ്കച്ചനെ !

അതു കഴിഞ്ഞാൽ ഹാൻഡിലിൽ കയറിയിരുന്ന് കാഴ്ചക്കാരെ ശ്വാസംമുട്ടിക്കുന്ന റൗണ്ട് .
ഒരു മിന്നായം പോലെ പ്രത്യക്ഷപ്പെടുന്ന തങ്കച്ചൻ നിമിഷ നേരം കൊണ്ട് എത്ര തിരക്കുള്ള തെരുവിനെയും തൻ്റെ കളിക്കളമാക്കി മാറ്റും .
മുക്കാൽ മണിക്കൂർ നീളുന്ന പ്രകടനം കഴിഞ്ഞാൽ വിസ്മയം കൊണ്ട് മതിമറക്കുന്ന ജനങ്ങൾ തങ്കച്ചന് നോട്ടുമാല വരെ ഇട്ടു കളയും .
1983 ലെ റിപ്പബ്ളിക് ദിന പരേഡിൽ പങ്കെടുത്ത് സാഹസിക പ്രകടനങ്ങൾ നടത്തിയതാണ് പാലാ തങ്കച്ചൻ്റെ ജീവിതത്തിലെ മറക്കാനാകാത്ത അനുഭവം .
കെ. കരുണാകരൻ്റെ വലംകൈ ആയിരുന്ന
എം എ ജോൺ ആയിരുന്നു അതിന് അവസരമൊരുക്കിയത് .
പരേഡിൽ പങ്കെടുക്കുന്ന പട്ടാളക്കാർക്കു മുന്നിൽ , ഓടിക്കൊണ്ടിരിക്കുന്ന ബൈക്കിൽ ദേശീയ പതാക പിടിച്ച് എഴുന്നേറ്റു നിന്ന തങ്കച്ചൻ്റെ പ്രകടനം കണ്ട് സാക്ഷാൽ ഇന്ദിരാഗാന്ധി അത്ഭുതപ്പെട്ടു !!

സർട്ടിഫിക്കറ്റു നൽകും നേരം ഇന്ദിര തങ്കച്ചനോട് പേരും സ്ഥലവും ചോദിച്ചു .
മറുപടി പറഞ്ഞപ്പോൾ ഒരു പുഞ്ചിരിയോടെ ഇന്ദിര പറഞ്ഞു
‘ ‘ നൈസ് നെയിം
പാലാ തങ്കച്ചൻ ‘ ‘
അങ്ങനെയാണ് തൻ്റെ പേര് പാലാ തങ്കച്ചൻ എന്നുറച്ചു പോയതെന്ന് തങ്കച്ചൻ അഭിമാനത്തോടെ പറയുന്നു .
ഏതാണ്ട് അര നൂറ്റാണ്ടായി സാഹസിക കലാപ്രകടന രംഗത്തുള്ള തങ്കച്ചന് സർക്കാർ ഇന്നുവരെ ഒരുവിധ അംഗീകാരവും നൽകിയിട്ടില്ല . അതിൽ പക്ഷെ തങ്കച്ചന് പരിഭവമില്ല . തനിക്ക് കഴിയുന്ന ഒരു കാര്യം ജനങ്ങളുടെ മുന്നിൽ അവതരിപ്പിക്കുന്നു . അത്രതന്നെ !!
എൺപതുകളിലെ ചില സിനിമകളിൽ സാഹസിക രംഗങ്ങളിലെ ഡ്യൂപ്പായി തങ്കച്ചൻ അഭിനിയിച്ചിട്ടുമുണ്ട് .

വരന്മാരെ ആവശ്യമുണ്ട് ,
താവളം
കാളിയമർദ്ദനം
ഇങ്ങനെ ചില സിനിമകൾ !
ആധാറിൽ വയസ് 73 ആയെങ്കിലും , പാലാ തങ്കച്ചന് വയസ്സ് ഇപ്പോഴും 30 ആണ് പ്രായം …
എന്ന് ആളുകൾ പറയും .
സൈലൻസർ ഊരിവച്ച് , ആക്സിലറേറ്റർ റബ്ബർബാൻ്റു കൊണ്ട് കെട്ടിവച്ച KLV 2558 ജാവാ ബൈക്ക് ഏതു നേരവും കടന്നു വരാം ..
ജനങ്ങളുടെ നെഞ്ചിടിപ്പു കൂട്ടുന്ന കിടിലൻ നമ്പറുകളുമായി …
കടപ്പാട്
നിത്യാനന്ദൻ