🧚🏽‍♀️തിരുവാതിരരാവിൽ🧚🏽‍♂️

രചന : കൃഷ്ണമോഹൻ കെ പി ✍

നൃത്തച്ചുവടു വച്ചീ വഴിയെത്തിയ
പൂത്തിരുവാതിര നാളേ
മുത്തമിട്ടീടുന്നു നിൻ്റെ കപോലത്തിൽ
ചിത്തം കുളിർത്തൊരീ ഭൂമി
ഭർത്താവിനുത്തമ യോഗം വരുത്തുവാൻ
ഒത്തുചേർന്നാടുന്നു സ്ത്രീകൾ
മൈക്കണ്ണിമാരുടെ മാസ്മരനർത്തനം,
മുക്കണ്ണൻ കണ്ടു രസിപ്പൂ
പാർവതീവല്ലഭൻ പാണിയും കൊട്ടിയീ
പാരിനെയുറ്റുനോക്കുമ്പോൾ
പുത്തൻ തിരുവാതിരയ്ക്കൊത്തങ്ങു ശീലുകൾ
പുഷ്പാഭിഷേകം നടത്തീ
സഞ്ചാരിയാകുന്ന നാരദൻ തന്നുടെ
പൊന്മണി വീണയിലൂടെ
മൊഞ്ചോടൊഴുകുന്ന സംഗീതം കേട്ടതാ
മഞ്ചത്തിൽ പാൽക്കടൽ നാഥൻ
മഞ്ജീര ശിഞ്ചിത കുഞ്ജകുടീരങ്ങൾ
പൂനിലാപ്പൂമഴ തന്നിൽ
തന്മയത്വത്തോടെയാകെക്കുളിച്ചു പോയ്
പാതിരാപ്പൂവുകൾ ചൂടീ🫶🏾