🖤”നിങ്ങൾ എപ്പോഴെങ്കിലും അവരെ കുറിച്ച് ചിന്തിച്ചിട്ടുണ്ടോ…? “

രചന : പ്രണയം ✍

ചോദ്യം നിങ്ങളോടാണ്… മറ്റൊരാളോട് എന്നും കൂടെയുണ്ടാകും എന്ന് പറഞ്ഞു വിശ്വസിപ്പിച്ച്… പാതിവഴിയിൽ ഉപേക്ഷിച്ചു പോയവരോട്…
ചോദിക്കുന്നത് അവരെ കുറിച്ചാണ്…
ആത്മാർത്ഥമായി വിശ്വസിച്ച് സ്നേഹിച്ചിട്ടും… ഒടുവിൽ നിങ്ങൾ ഉപേക്ഷിച്ചവരെ കുറിച്ച്…
പരിചയപ്പെട്ടപ്പോഴും ഇപ്പോഴും ഒരേ സാഹചര്യവും.. തിരക്കും ആയിരുന്നിട്ടും… കൗതുകങ്ങൾ തീർന്നപ്പോൾ ഒഴിവാക്കാൻ നിങ്ങൾ പറയുന്ന ന്യായീകരണങ്ങൾ കേട്ട് പകച്ചുപോയവരെ…
ഒരിക്കൽ.. ഭക്ഷണം, ആഘോഷങ്ങൾ, ഉറക്കം, ബന്ധുക്കൾ, സൗഹൃദങ്ങൾ, യാത്രകൾ, ജോലികൾ… എന്തിന് സ്വന്തം ജീവിതം ഉൾപ്പെടെ…പലതും മാറ്റിവെച്ച് നിങ്ങൾക്കായി സമയം കണ്ടെത്തിയവരെ…
ഒരു ദിവസം പോലും കാണാതിരിക്കാൻ ആവില്ല എന്ന് നിങ്ങളുടെ വാക്ക് കേട്ട് ഒരിക്കൽ സന്തോഷിക്കുകയും… ഒടുവിൽ മാസങ്ങളോളം നിങ്ങളെ കാണാതായപ്പോൾ സത്യമേത് മിഥ്യയേത് എന്ന് തിരിച്ചറിയാതെ പകച്ചുപോയവരെ…
മരണംവരെ പിരിയാനാകില്ല എന്ന വാക്ക് പറഞ്ഞ നിങ്ങൾ വല്ലപ്പോഴും ഒരു അതിഥി മാത്രമായപ്പോൾ തിരിച്ചറിയാതെ പോയ നാട്യങ്ങൾ ഓർത്ത് അതിശയിച്ചുപോയവരെ..
തുടക്കത്തിൽ ദിവസം മുഴുവൻ അവർക്ക് ഒപ്പം ഉണ്ടാവുകയും പിന്നീട് ഒരു ദാനം എന്നപ്പോൽ നിങ്ങൾ വലിച്ചെറിയുന്ന ശുഭദിന-ശുഭരാത്രി ആശംസകൾ എറിഞ്ഞു കിട്ടുന്ന എല്ലിൻ കഷണങ്ങൾ ചാടി പിടിക്കുന്ന പട്ടിയെപ്പോലെ സ്വീകരിക്കുന്നവരെ…
ദിവസത്തിൽ പല പ്രാവശ്യം വിളിച്ചിരുന്ന നിങ്ങൾ… ഇപ്പോൾ വല്ലപ്പോഴും നിങ്ങൾക്ക് എന്തെങ്കിലും ലാഭമുള്ള കാര്യത്തിനായി മാത്രം വിളിക്കുമ്പോൾ… കാര്യം മാത്രം പറഞ്ഞ് പെട്ടെന്ന് നിങ്ങൾ അവസാനിപ്പിക്കുമ്പോൾ സുഖമല്ലേ എന്നൊരു ചോദ്യം എങ്കിലും ആകാംക്ഷയോടെ കാത്തിരിക്കുന്നവരെ…
തുടക്കത്തിൽ നിങ്ങളുടെ മാറ്റം വിശ്വസിക്കാനാകാതെ കണ്ണീരും പരാതിയുമായി നിങ്ങൾക്ക് മുന്നിൽ എത്തുകയും… അവരുടെ സങ്കടത്തിന് നിങ്ങൾ ഒരു വിലയും കൽപ്പിക്കില്ല എന്ന് ഉറപ്പായപ്പോൾ നോവിന്റെ നിശബ്ദതത്തിലേക്ക് മടങ്ങി…ഒരിക്കൽപോലും മറ്റുള്ളവരോട് നിങ്ങളെക്കുറിച്ച് പരാതിയോ കുറ്റമോ പറയാത്തവരെ…
ഒരു യാത്രാമൊഴി പോലും പറയാതെ നിങ്ങൾ പടിയിറങ്ങിയപ്പോൾ തുടക്കത്തിൽ ഒന്നും മനസ്സിലാകാതെ ഒടുവിൽ ഉപേക്ഷിക്കപ്പെട്ടു എന്ന സത്യം തിരിച്ചറിഞ്ഞപ്പോൾ തകർന്നു പോയവരെ…
നിങ്ങൾ അവർക്ക് കൊടുത്ത പാലിക്കപ്പെടാത്ത വാക്കുകൾക്കും… നിങ്ങൾ മൂലം നഷ്ടപ്പെട്ടു പോയ അവരുടെ സന്തോഷങ്ങൾക്കും ഇടയിൽ പതറി പോയവരെ…
പുതിയ കൗതുകങ്ങൾ തേടി നിങ്ങൾ പോയപ്പോൾ… ആത്മാർത്ഥമായി സ്നേഹിച്ചതിന്റെ പേരിൽ മറക്കാനാകാതെ മരവിച്ച മനസ്സുമായി കണ്ണീരിലും ഇരുട്ടിലും മുങ്ങിപ്പോയവരെ…
തുടക്കത്തിൽ സ്നേഹം നടിച്ച്.. ഒടുവിൽ നിങ്ങൾ കോമാളികൾ ആക്കി വലിച്ചെറിഞ്ഞ വിലകുറഞ്ഞ ആ കളിപ്പാട്ടങ്ങളെ…🖤
🌟