🌹ഒറ്റമുറി 🌹

രചന : രശ്മി നീലാംബരി✍️

വീടിന് ഈറൻ മണമാണ്.
ചിലപ്പോൾ ആദ്യമായി കുളിരണിഞ്ഞ
മണ്ണിന്റേയും.
അതിലെന്റെ മുറി മാത്രം
ഒരു പക്ഷേ;
എനിക്ക് മാത്രം സുന്ദരമെന്ന്
അവകാശപ്പെടാനാവുന്നത്ര
വിങ്ങലുകളാൽ
നിശബ്ദമായ്, പുഞ്ചിരിച്ച്
മേഘങ്ങളാൽ നിറഞ്ഞ് കിടക്കും.
പെയ്യാൻ മടിച്ചു നിൽക്കുന്നവ
പെയ്താൽ, തോരാൻ
തിരിച്ച് പോരാൻ
അത്രയേറെ കൊതിയില്ലാത്തവ.
എന്തുകൊണ്ടോ,
അറിയില്ല
എത്രയോ വിരസമായ
സമുദ്രങ്ങളിൽ
ആവേശത്തോടെ തുഴയെറിഞ്ഞ്
ഞാൻ തേടുന്ന കര.
കാണാത്ത പൂമരത്തിന്റെ
കരിയാത്ത വേരുകൾ
തേടിയിറങ്ങിയപ്പോൾ
തുറന്നിട്ടതാണ് രണ്ട് കണ്ണുകൾ.
ന്യായാന്യായങ്ങളുടെ
വേലിയേറ്റയിറക്കങ്ങളിലൂടെ
ചന്ദ്ര രശ്മികൾ
വിശാലമാക്കുന്ന വാതായനം.
പരിഭവങ്ങളുടെ
ചിത്രത്തുന്നലുകളുമായ്
ജാലക വിരികൾ.
നിഴൽക്കൂത്തുകളില്ലാത്ത
അസ്തമയങ്ങൾ
തണുപ്പിലേക്കിറങ്ങിച്ചെല്ലാൻ
ഇനിയെന്തിന് വീട്?
വശ്യതയോടെ
ചൂടിടങ്ങൾ ഒരുക്കി
എന്റെ ഒറ്റമുറി.
(ഒരേ ഒരു സൂര്യനിൽ നിന്നും)